اسلام آباد۔ 10 اگست (اے پی پی) وزیر دفاع خرم دستگیر خان پارینے کہ 2013ءنا لس گچین کاری تیٹی الس محمد نواز شریف نا سروکی ٹی پاکستان مسلم لیگ (ن) آ تینا پت انا درشانی ئِ کریسس و داسہ ریلی ٹی الس مسکوہی وزیراعظم تون تینا مابت نا درشانی ئِ کننگ ئُ۔ پی ٹی وی نا پروگرام اٹی ہیت وگپ کرسا اوپارے کہ عدالت عظمیٰ نا فیصلہ غا عملدرآمد آن پد مسکوہی وزیراعظم محمد نواز شریف جی ٹی روڈ نا کمک اٹ لاہور تینا اُراغا پدی ہِننگ ئِ ، محمد نواز شریف آ مسہ وار تینا پت انا درشانی ئِ کرینے و او داسہ تینا وونٹر آتے عدالتی فیصلہ غا تینا گڑتی تینا معلومدار کننگ خواہک۔ وزیردفاع پارے کہ پاک چین اقتصادی راہداری نا ڈٹ و نیامی ایشیا تون اوار علاقائی ملک آتون رابطہ غاتیٹی ودکی مسکوہی وزیراعظم محمد نوا زشریف نا پالیسی تا بھرم ئِ۔ اسہ سوج اسے آ اوپارے کہ ایلو علاقہ غاتیامبار گوجرانوالہ نا الس ہم مسکوہی وزیراعظم نا بننگ نا وخت آ بے کچ پرجوش ئُ و ہموڑے اودے بے مثل بخیر اٹ پاننگک ، گوجرانوالہ مسلم لیگ (ن) نا گڑہ ئِ و ہموجاگہ نا شاریک تینا راہشون نا بننگ نا انتظارئِ کننگ ئُ۔ اوپارے کہ دہشت گردی نا برخلاف جنگ اٹی سلہہ بند فوج پبی کڑد ادا کننگ ئِ و داجنگ اٹی ننا فورس آتا قربانیک ستاکڑزرہ۔ دہشت گردی نا برخلاف جنگ اٹی پاکستان غٹ آن زیات قربانی تسنے۔ اسہ سوج اسے آ اوپارے کہ مسکوہی وزیراعظم نا ریلی نا غٹ بست وبند آتے پاکستان مسلم لیگ (ن) کننگ ئِ۔
