صدر مملکت ممنون حسین نا جامعہ بلوچستان نا 14می کانووکیشن آن تران

پاکستان نا شونداری بلوچستان تون گنڈوک ئِ، صوبہ نا پسماندگی و احساس محرومی تا چٹفنگ کن ساڑی حکومت پبی گام گیج چست کرینے، داڑے دنیا نا پوسکن انگا و ڈیپ سی پورٹ جوڑ مننگ ئِ، بلوچستان اٹی سی پیک نا رداٹ پوسکن ئُ ڈٹ و روڈ آتا جال اس شاغنگ انگ ئِ ، شونداری ڈٹ آتے وخت آ پورو کننگک
کوئٹہ۔ 09 اگست (اے پی پی) صدر مملکت ممنون حسین پارینے کہ بلوچستان نا آخبت روشنائِ، پاکستان نا شونداری بلوچستان تون گنڈوک ئِ، بلوچستان کیہی دہائی تیان محرومی تاگواچی مسنے، بلوچستان نا پسماندگی و احساس محرومی تا چٹفنگ کن ساڑی حکومت پبی چکار تخسا گچین گام گیج چست کرینے، صوبہ ٹی دنیا نا پوسکن انگا و ڈیپ سی پورٹ جوڑ مننگ ئِ ، بلوچستان نا الس نا احساس محرومی تا چٹفنگ کن سی پیک اٹی پوسکن ئُ ڈٹ بناءکننگ انگ ئِ و روڈ آتا جال اس شاغنگ انگ ئِ ، ساڑی حکومت نا دور اٹی بناءکروک آ شونداری ڈٹ آتے بروخت پورو کننگک تانکہ آخبت اٹی شونداری نا سفر سلپ و داجاگہ نا الس ئِ اوفتا بھرم آک دوبریر۔ داہیت ئِ صدر مملکت ممنون حسین چارشنبے نادے جامعہ بلوچستان نا 14می کانووکیشن نا دود آن تران کرساپارے۔ صدر مملکت پارے کہ بلوچستان پاکستان نا اسہ ہندن ئُ مردم خیز ئُ ڈیہہ اسے ہرا ہموننگا بھلا بھلا شخصیت آتے ودی کرینے ہرافتا علم، لائخی و کارنامہ غاتا دائمی نقش تاریخ نا پنہ غاتیا نوشتہ ئُ، دااسہ است خواہ ئُ تاریخی ئُ اتفاق اسے کہ دنیا اینو اسہ وار ولدا ننا کنڈآ اومیت آن پر خن تیٹی ہُننگ ئِ ہراٹی وطن عزیز نا ایلو ڈیہہ تیان بیدس بلوچستان نا کڑد کلیدی ئِ۔ اوپارے کہ قومی تاریخ نا دانادر و عظیم الشان مرحلہ غا بلوچستان نا ورناک اسہ ہندن ئُ کڑد اس ادا کننگ والا ئُ ہراڑآن دا صوبہ و وطن عزیز ہی آخا، مچ آ دنیا فخر آن اوفتا کنڈآہرک۔ وطن عزیز، خاص وڑاٹ بلوچستان ہرااقتصادی انقلاب نا درگہ غا سلوک ئِ اونا تعلق آن دا دود انا اہمیت غیر معمولی ئِ۔ کنے بلوچستان نا ورناتا لائخی تیا پت ئِ و یخین ئِ کہ او وطن عزیز نا کنڈآن عائد مروک آ زمواری تیا بہ احسن و جوانی اٹ پورو سلرہ، داچرجوئی ٹی جامعہ بلوچستان و صوبہ نا ایلو تعلیمی ادارہ غاتا زمواری تیٹی بھاز زیات ودکی مسنے۔ اوپارے کہ صوبائی حکومت ، بنجا و ایلو قومی ادارہ غاتا کمک اٹ دا ادارہ تینا کڑد ئِ جوانی اٹ ادا کیک۔ صدر مملکت فارغ التحصیل مروک آ طالب علم آتے مخاطب کرسا پارے کہ داطالب علم آک تینا زند انا گچین تُو و سال ئِ علم انا دوئی ٹی گدریفینو و اینو داخواری رنگ اس اتنگ ئِ ہراڑآ او اوفتے ، اوفتا لمہ وباوہ و استاد آتے مبارکبادی ایتک و آخبت اٹی نما پین سرسہبی وشونہالی کن دعاگواُٹ، تعلیم نا چندی مرحلہ غاتا پوروی نا مطلب دادے کہ انسان آخبت نا چیلنج آتون مون تننگ کن بنائی تربیت پورو کرسا میدان عمل اٹی پترینگانے۔ صدر مملکت پارے کہ قائد اعظم محمد علی جناح ؒ نا پنت و شون نا رداٹ تینے عملی سیاست آن لاتعلق تخبو ولے قومی شونداری ، سوگوی و سلامتی کن کڑد ادا کننگ آن وخت اس ہم پاناد کپبو۔ صدر مملکت مستی پارے کہ آخبت خڑک اٹی ننا وطن و خاص وڑاٹ بلوچستان ہراوڑ مچ آ دنیا آن بری، بحری و فضائی کسرتا کمک اٹ گنڈوک مننگ والا ئِ دانا پیش نظر المی ئِ کہ نن تینا لائخی تے پبی وڑاٹ تالان کرسا کاریم اٹ اتین، دا چرجوئی ٹی صوبہ بلوچستان نا معدنیات ، صنعتی پیداوار ، دودوربیدہ و تاریخی میرات و سیل و سوات نا مون آ دننگ ئِ تینا اولیتی بنداو تیا کاریم اٹ اتوئی مریک، کنا خواہش ئِ کہ بلوچستان نا تعلیمی ادارہ خاص وڑاٹ جامعہ بلوچستان سیل و سوات، ہوٹلنگ ، کنوئی آ گڑاتا ہندی رجحان و دودوربیدہ ئِ کسبی وڑاٹ شون تننگ کن تینا کڑد ئِ ادا کیر تانکہ پاک چین اقتصادی راہداری نا فعالی آن پد ودی مروک آ وارخواہی تیان پبی فائدہ ہرفنگ مرے۔ صدر مملکت پارے کہ ای ایوان صدر نا خڑچ آتیٹی بچت کرسا اسہ بھلو پیسہ اس نیشنل یونیورسٹی آف ماڈرن لینگویجز (نمل) نا حوالہ کریٹ تانکہ گوادر اٹی کیمپس اڈ ترسا بلوچستان نا چناتے چینی بولی ئِ ہیل تننگ مرے۔ اقتصادی راہداری نا فعالی آن پد ہندی آبادی ئِ اونا بھرم آتے سرکننگ کن داوڑنا گام گیج آتاپدریسہ کننگ نا گرج ئِ، دامعاملہ بنجائی و صوبائی حکومت نا اولیت آتیٹی اوار ئِ ہرافتیا پیش رفت برجاسلک۔ داکان مست صدر مملکت ممنون حسین جامع بلوچستان آن فارغ التحصیل طالب علم آتیٹی سند و گولڈ میڈل بشخ وپانٹ کرے۔ آخراٹی صدر مملکت بلوچستان یونیورسٹی نا انتظامیہ نا سخت کوشست آتا ستائِ کرے و فارغ التحصیل طالب علم آتے مبارکبادی تس۔ داوخت آ گورنر بلوچستان محمد خان اچکزئی، وائس چانسلر بلوچستان یونیورسٹی ڈاکٹر جاوید اقبال صوبائی وزیر آ ک و ایلو بڑزکو کمامدارآک ہم ساڑی ئسر۔