بھارت نا ڈپٹی ہائی کمشنر ئِ دفترخارجہ غا بٹنگ انگ ، بھارتی فورس آتا بلااشتعال سم کاری آ شدید برانز کننگا

اسلام آباد۔ 08 اگست (اے پی پی) بھارت نا ڈپٹی ہائی کمشنر ئِ سے شنبے نادے دفترخارجہ غا بٹنگسا تدوک آدے بھارتی فورس آتا کنڈآن کھوئی رٹہ و کیرالہ سیکٹر اٹی بلا اشتعال سم کاری آ شدید برانز کننگا۔ دفترخارجہ نا ترجمان نا رداٹ ہندا سال بھارتی فورس آک ایل او سی و ورکنگ باﺅنڈری آ 600 آن زیات وار سیزفائر نا خلاف ورزی ئِ کرینو ہراٹی داوخت اسکان 25بے گناہ شاری شہید و 110 آن زیات ٹھپی مسنو۔ ترجمان نا رداٹ سے شنبے ناد ے بھارتی ڈپٹی ہائی کمشنر جے پی سنگھ ئِ دفترخارجہ غا بٹنگسا 7 اگست آ کھوئی رٹہ و کیرالہ سیکٹر اٹی بھارتی فورس آتا کنڈآن بلااشتعال سم کاری ٹی 35سالہ نیاڑی نا شہیدی آ برانزی مراسلہ ئِ اونا حوالہ کریر۔ ترجمان نا پاننگ ئِ کہ رزاک اٹ بے گناہ شاری تے نشانہ جوڑ کننگ بے کچ قابل مذمت، انسانی وقار ، جہانی انسانی حق و کانود نا برخلاف ئِ۔ دفترخارجہ بھارت آ زور شاغاکہ او سیز فائر معاہدہ نا اونا روح انا رداٹ پاسداری ئِ کے و بھارتی فورس آتے معاہدہ نا پاسداری نا پارت کے۔