وزیراعظم شاہدخاقان عباسی نا توانائی نا بشخ انا بارواٹی دیوان آن تران

لوڈشیڈنگ نا چٹفنگ کن ترندی اٹ گام گیج آک برجائُ، ننا چکار پاکستان کن اسہ روشنائُ آخبت اسے المی جوڑ کننگ آٹی ئُ، تھرمل پاور وسیلہ غاتا کاریم اٹ اتنگ اٹی کمتی کن روڈ میپ اس جوڑ کننگے
اسلام آباد۔ 08 اگست (اے پی پی) وزیراعظم شاہد خاقان عباسی داعزم انا اعادہ ئِ کرینے کہ لوڈشیڈنگ نا چٹفنگ کن ترندی اٹ گام گیج آک برجائُ و ننا چکار پاکستان کن اسہ روشنائُ آخبت اسے المی جوڑ کننگ آٹی ئِ۔ اوداہیت ئِ سے شنبے نا دے وزیراعظم آفس اٹی توانائی نا بشخ انا بارواٹی دیوان نا کماشی ئِ کرسا پارے۔ داوخت آ اودے توانائی نا بشخ انا بارواٹی بریفنگ تننگا۔ دیوان اٹی وزیر مملکت بجلی عابد شیرعلی، وزیر مملکت پٹرولیم جام کمال و ایلو بڑزکو کمامدارآک ساڑی ئسر۔ سیکرٹری پاور ڈویژن و سیکرٹری پٹرولیم ڈویژن وزیراعظم ئِ توانائی نا ڈٹ جات و لوڈمینجمنٹ پلان نا بارواٹی معلومدار کریر۔ وزیراعظم وزارت آتیٹی کاریم نا مناسب بشخ وپانٹ نا وضاحت ئِ کرساپارے کہ آبی رکھ پاکستان نا حکومت و الس کن اہمیت تخوک ئُ معاملہ اسے، آبی وسیلہ غاتا گچین بست و بند و داڑتون تعلقدار ویل آتون مون تننگ کن آبی وسیلہ غاتا اسہ جتا ئُ وزارت اس المی ئس۔ توانائی نا پوسکن آ وزارت نا جوڑ کننگ نا بابت وزیراعظم پارے کہ پٹرولیم و بجلی نا بشخ انا نیام اٹ فائروال ئِ مرکننگ المی ئس ہرا ایلو دروشم پاکستان اٹی توانائی نا رکھ انا اسیجائی مسخت تون گنڈوک ئِ۔ وزیراعظم پاور ڈویژن و پٹرولیم ڈویژن ئِ پارت کرے کہ تھرمل پاور وسیلہ غاتا کاریم اٹ اتنگ اٹی کمتی کن روڈمیپ اس جوڑ کننگے و داڑآن بیدس توانائی نا پیداوار کن قدرتی گیس و ملکی کولاآ چکار تخنگے۔ اوپارے کہ ننا حکومت ملکی توانائی نا گرج آتے پورو کننگ کن وسیلہ غاتا متوازن کاریم اٹ اتنگ کن کوشست کننگ ئِ۔ تھرکولا نا کوڑی نا زیات آن زیات کاریم اٹ اتنگ ئِ المی جوڑ کننگے تانکہ صارف آتے ہڑزان توانائی فراوان مرے ۔ وزیراعظم آبی وسیلہ ڈویژن ئِ پارت کرے کہ آبی کوڑی نا ڈٹ جات آتے کن ڈٹ بندی آ کاریم ئِ ترند کننگے۔