وزیراعظم شاہد خاقان عباسی نا سویلی کوریا نا قومی اسمبلی نا اسپیکر چنگ سائیکیون نا سروکی ٹی ڈل اتون ہیت وگپ

اسلام آباد۔ 08اگست (اے پی پی) وزیراعظم شاہد خاقان عباسی پارینے کہ پاکستان جمہوریہ کوریا تون مسہ دہائی آن زیات وخت آن محیط شاندار سفارتی تعلقداری تے بھاز اہمیت ایتک، ہڑتوم آ ملک آتا نیام اٹ واپار و زرکاری تون اوار غٹ بشخ آتیٹی دوستانہ تعلقداریک سوگو مننگ ئُ ۔ اوداہیت ئِ سویلی کوریا نا قومی اسمبلی نا اسپیکر چنگ سائیکیون نا سروکی ٹی ڈل اتون ہیت وگپ کرسا پارے ہرا سے شنبے نادے وزیراعظم آفس اٹی اوڑتون اوڑدہی کریر۔ اسپیکر قومی اسمبلی سردارایاز صادق ہم داوخت آ ساڑی ئس۔ وزیراعظم ہڑتوم آ کنڈآتا واپار نا کچ اٹی ودکی کن گچین گام گیج آتا گرج آ زورشاغسا کورین کمپنی تے پاکستان نا آزادانہ زرکاری چاگڑد آن پبی فائدہ ہرفنگ و توانائی ، معدنیات و کشاری صنعت و آئی ٹی نا بشخ آتیٹی خاص کر زرکاری نا سلہ خلک۔ اوپارے کہ پاکستان نا حکومت خاص ئُ اقتصادی زون اڈ تسنے و کورین کمپنیک دازون آتیٹی تینا یونٹ آتے اڈ تننگ کیرہ۔ چنگ سائیکیون جم و جوش اٹ بیابخیری آ وزیراعظم نا منت واری ئِ ہرفسا اومیت ظاہر کرے کہ ہڑتوم آ کنڈآتا تعلقداریک پین سوگو مریرہ۔ سویلی کوریا نا ڈل اٹی پارلیمان نا باسک کم دونگ، بیونگ گگ، ہونگ مون پائیو، بائیک ہون، آن گیوبیک و لی ون ووک اوار ئسر۔