بری فوج انا سروک جنرل قمر جاوید باجوہ نا 203می کورکمانڈر کانفرنس آن تران

داخلی و خارجی سیکورٹی حالیت آتا جاچ ئِ ہلنگا، لین آف کنٹرول آ تازہ انگا حالیت آتا بارواٹی بریفنگ تننگا
راولپنڈی۔ 07 اگست (اے پی پی) بری فوج انا سروک جنرل قمر جاوید باجوہ پارینے کہ قومی ادارہ غاتون اواری اٹ دہشت گرد آتے شکست ایتنہ، آئین و کانود نا بالادستی ئِ ہردروشم اٹ برقرار تخنگک۔ اودوشنبے نا دے 203می کورکمانڈر کانفرنس آن تران کریکہ۔ پاک فوج انا شعبہ تعلقات عامہ (آئی ایس پی آر) نا رداٹ 203می کورکمانڈر کانفرنس آرمی چیف جنرل قمر جاوید باجوہ نا کماشی ٹی جی ایچ کیو راولپنڈی ٹی مس۔ فورم داخلی و خارجی سیکورٹی حالیت آتا جاچ ئِ ہلک۔ فورم علاقائی سیکورٹی خاص کر اوغانستان نا حالیت آتا جاچ ئِ ہلک و علاقائی امن و سلامتی کن تینا کڑد ئِ جاری تخنگ نا عزم ئِ کرے۔ آرمی چیف پارے کہ نن دابابت پت آ مبنی تین پہ تینی کمکاری ئِ خوانہ ہرا علاقائی امن نا پالیسی نا نتیجہ غاتے دوئی کننگ کیک۔ کورکمانڈر کانفرنس ئِ لین آف کنٹرول نا تازہ انگا حالیت آتا بابت ہم بریفنگ تننگا۔ فورم آپریشن ردالفساد نا کمک اٹ دوئی کروک آ دورس مثبت نتیجہ غاتا ستا ئِ کرے۔ آرمی چیف آپریشن خیبر فور اٹی کم از کم جانی نسخان آتون بڑزکو کسبی معیار تا سوب سرسہبی دوئی کننگ نا ستائِ کرے۔ قومی سلامتی و دفاع نا بابت پاک فوج انا عزم آ پورو است جمی نا درشانی ئِ کرسا آرمی چیف جنرل قمر جاوید باجوہ پارے کہ دہشت گرد آتے شکست تننگ کن کوشست آتے برجاتخنہ۔ قومی ادارہ غاتون اواری اٹ دہشت گردی ئِ شکست ایتنہ و آئین وکانود نا بالادستی ئِ ہردروشم اٹ برقرار تخنگک۔