چیئرمین سینیٹ رضاربانی نا ایرانی صدر ڈاکٹر حسن روحانی تون اوڑدہی، تین پہ تینی است خواہی نا معاملہ و ڈیہہ نا جم اٹنگا حالیت آتیا خیال آتا درشانی ئِ کننگا

اسلام آباد۔ 07 اگست (اے پی پی) چیئرمین سینیٹ میاں رضاربانی ایران نا دارالحکومت تہران اٹی دُوارہ گچین مروک آ ایرانی صدر ڈاکٹر حسن روحانی تون اوڑدہی کرے و تین پہ تینی است خواہی نا معاملہ و ڈیہہ نا جم اٹنگا حالیت آتیا خیال آتا درشانی ئِ کرے۔ اوڑدہی ٹی چیئرمین سینیٹ پاکستان نا چارٹکی ایجنڈا غا ہیت وگپ کرسا پارے کہ ننا خواہش ئِ کہ توانائی و مواصلاتی نظام نا کمک اٹ رابطہ کاری، اقتصادی کمکاری، سیکورٹی نا ویل و پارلیمانی رابطہ غاتے مون آ دننگے۔ چیئرمین سینیٹ پارے کہ پاکستان ایران تون تینا تعلقداری تے قدر انا نظر اٹ ہرک۔ چیئرمین سینیٹ مقبوضہ کشمیر نا معاملہ غا ایران نا موقف نا منت واریئِ ادا کرے ہرانا درشانی ئِ ساڑی ہی ٹی ایران نا سپریم لیڈر آیت اللہ علی خامنائی ہم کرینے۔ چیئرمین سینیٹ بھارتی فوج انا دوتے اٹ مقبوضہ کشمیر اٹی مروک آ بیدادی و انسانی حق انا خلاف ورزی تا بارواٹی ایرانی صدر ئِ معلومدار کرے۔ ایرانی صدر گدرینگوک آ سال تینا پاکستان نا دورہ غاتا ہم ذکر ئِ کرے و دا اومیت نا درشانی ئِ کرے کہ ہڑتوم آ ملک آتا نیام اٹ تعلقداریک سوگو آن سوگو مریرہ۔ چیئرمین سینیٹ پارلیمانی ڈل اتون اوار ایران نا دورہ غاٹی ئِ۔ ڈل اٹی سینیٹر میر محمد یوسف بادینی، ہدایت اللہ ، غوث محمد خان نیازی و راحیلہ مگسی اوار ئُ۔