وزیر خارجہ خواجہ محمد آصف نا صدر آزاد کشمیر تون اوڑدہی ٹی ہیت وگپ

جہانی برادری مقبوضہ کشمیر اٹی انسانی المیہ نا نوٹس ئِ اَلے
اسلام آباد۔ 07 اگست (اے پی پی) وزیر خارجہ خواجہ محمد آصف مقبوضہ کشمیر نا حالیت آتیا گڑتی نا درشانی ئِ کرسا پارینے کہ جہانی برادری ہموڑے رونما انسانی المیہ نا نوٹس ئِ اَلے، کشمیر نا ویل انا ایسری آن بیدس سویلی ایشیاٹی پائیدار امن ممکن اف۔ پاکستان مقبوضہ کشمیر نا الس نا حق خودارادیت نا دوئی کن اوفتا سفارتی ، سیاسی و اخلاقی مخ تفی ئِ برجاتخک، کشمیر نا ویل ننا خارجہ پالیسی تا بنداوی تمبہ ئِ، نن کشمیری تا حق آ ہچ ئُ سمجھوتہ اس کپنہ۔ دوشنبے نا دے صدر آزاد جموں و کشمیر سردار مسعود خان تون وزیرخارجہ پاکستان خواجہ محمد آصف اوڑدہی کرے، مقبوضہ کشمیر نا تازہ انگا حالیت، ورناتا جعلی مقابلہ غاتیٹی شہیدی، حریت راہشون آتا دزگیری، کنٹرول لین آ سیز فائر معاہدہ ناخلاف ورزی تتون اوار تین پہ تینی است خواہی نا معاملہ غاتیا سرجم خیال آتا درشانی ئِ کننگا۔ صدر سردار مسعود خان خواجہ محمد آصف ئِ وزارت امور خارجہ نا قلمدان ئِ سنبھالنگ آ مبارکبادی تس و قوی اومیت ظاہر کرے کہ او جہانی کہول آ پاکستان نا اہم انگا مفاد آتا رکھ اکن پبی کڑد ادا کیرہ۔ اوپارے کہ داوخت مقبوضہ کشمیراٹی کوزہ گر بھارتی فوج و اودیم ایجنسیک ظلم و بربریت نا بازار ئِ گرم کرینو۔ مقبوضہ کشمیر اٹی خلقت نا کاروبار و نجی ماڑی تے بھس کننگ انگ ئِ۔ اسکول آتیٹی خوانوک آ طالب علم و تدریسی عملہ ئِ ہراساں کننگک۔ سوشل میڈیا غا فعال ورناتے دزگیر کرسا جعلی مقابلہ غاتیٹی شہید کننگک۔ کل جماعتی حریت کانفرنس نا سرکڑدہ غاتے جیل آتیٹی اذیت تننگ انگ ئِ۔ الس آن روزگار نا ذریعہ غاتے پلنگانے۔ پدریسہ ہڑتال و کرفیو نا سوب الس کن زند انا گرج آتا دوئی ناممکن مسنے ۔ گڑاس علاقہ غاتیٹی فاقہ کشی نا نوبت بسنے۔ صدر سردار مسعود خان پارے کہ پاکستان نا اسہ حکومت اس ہم کشمیر نا ویل آ اصولی موقف آن روگردانی کتنے۔ ساڑی حکومت کشمیر نا ویل ئِ جہانی کہول آ تالان کننگ کن ٹھوس گام گیج کرے۔ مچ آ دنیا ٹی پاکستانی سفارت خانہ ہم دابابت سرگرم کڑد ادا کننگ ئِ۔ صدرآزاد کشمیر جہانی برادری آ زورشاغاکہ کشمیر نا ویل انا بابت دوہرامعیار و بے حسی نا پالیسی ئِ اِلے۔ انسانی حق انا خلاف ورزی ، مقبوضہ کشمیر اٹی آبادی نا تناسب ئِ بدل کننگ و غیرکشمیری تا ہموڑے بھلو کچ اسے آ آبادکاری نا نوٹس ئِ اَلے۔ انسانی حق انا سنگین خلاف ورزی و ورناتا ماورائے عدالت تپاخت آتے تورفنگے۔ وزیر خارجہ محمد آصف مقبوضہ کشمیر نا حالیت آتیا گڑتی نا درشانی ئِ کرسا پارے کہ جہانی برادری ہموڑ ے رونما انسانی المیہ نا نوٹس ئِ اَلے۔ پاکستان تینا سیم تا دفاع نا پبی لائخی تخک۔ اوپارے کہ نن بھارت تون پرامن تعقلداری تا خواہندار اُن۔ ہنداخاطران بھارتی حکومت پاکستان نا کوشست آتا مثبت ورندی اس ایتے۔ مقبوضہ کشمیر آن فوج ئِ پدی خوائفے و کشمیر ی تا انسانی حق انا شرف ئِ کے۔