سی پیک، ضلع پشین نا تحصیل بوستان اٹی انڈسٹریل زون نا اڈتننگ کن گام گیج آتا چرجوئی برجائِ، وزارت ڈٹ بندی

اسلام آباد۔ 07 اگست (اے پی پی) چین پاکستان اقتصادی راہداری ڈٹ(سی پیک ) نا رداٹ بلوچستا ن نا ضلع پشین نا تحصیل بوستان اٹی انڈسٹریل زون نا اڈتننگ کن گام گیج آتا چرجوئی برجائِ۔ وزارت ڈٹ بندی ٹی اڈ ہلوک سی پیک سیکرٹری نا کمامدارآک ”اے پی پی“ ئِ پاریر کہ بوستان انڈسٹریل زون کن 1000 ایکڑ ڈغار دوئی کننگانے و صنعتی بستی نا اڈتننگ کن گام گیج آتا چرجوئی ترندی اٹ برجائِ۔ کمامدارآتارداٹ دااقتصادی زون اٹی میوہ ، کشاری مشینری ، فارماسیوٹیکل، موٹرسائیکل اسمبلنگ، کرومائیٹس، کوکنگ آئل، سیرامک انڈسٹری ، آئس اینڈ کولڈ سٹوریج ، برقی ازباب، حلال فوڈ انڈسٹری و ایلو تعلقدار صنعت آتا اڈتننگ و اوفتے کن آسراتی آ چکار تخنگک۔ اوپاریر کہ بوستان انڈسٹریل زون 200 ایکڑ رقبہ غا شونداری کاریم پورو مسنے۔ دازون آن کوئٹہ بالی پٹ انا فاصلہ 23کلومیٹر، سی پورٹ آن 713 کلومیٹر، کراچی آن 976کلومیٹر، ڈرائی پورٹ(کوئٹہ) آن 32کلومیٹر وہائی وے N-50 زیروکلومیٹر ئِ۔ داڈٹ اٹی داوخت گیس و بجلی نا آسراتی دستیاب اف وخت اس کہ روڈ، گلی و ایلو آسراتیک اریر۔ اسہ سوج اسے آ اوفک پاریر کہ داعلاقہ ٹی صنعتی بستی نا اڈتننگ نا سلاہ صوبائی حکومت نا کنڈآن بسوسس۔ کمامدارآتارداٹ سی پیک نا ارٹ میکو مرحلہ نا رداٹ پاکستان اٹی چین نا کمک اٹ صنعتی انقلاب اس بریک، دامرحلہ ٹی ملک انا ہرچارآصوبہ ، گلگت بلتستان ، فاٹاو آزاد کشمیر اٹی جم وڑاٹ 9 صنعتی زون جوڑ کننگک۔ دامسخت کن صوبہ غاک چندی ہند آتا پیدواریئِ کریسر ہرافتے ٹی خیبر پختونخوا نا کنڈآن رشکئی اکنامک زون و سندھ انا کنڈآن چائنہ اکنامک زون دھاریجی، بلوچستان نا کنڈآن بوستان اکنامک زون و پنجاپ نا کنڈآن چائنہ اکنامک زون شیخوپورہ ، گلگت بلتستان نا کنڈآن مقپون داس گلگت وخت اس کہ کشمیر نا کنڈآن بھمبر صنعتی زون ئِ اوار کننگ نا سلاہ تننگاسس۔ دارالحکومت اسلام آباد اٹی آئی سی ٹی ماڈل انڈسٹریل زون وپورٹ قاسم اٹی پاکستان اسٹیل مل انا ڈغار آ انڈسٹریل پارک جوڑ کننگ وخت اس کہ فاٹا نا کنڈآن مومند ماربل انڈسٹریل زون جوڑ کننگک۔