عائشہ گلالئی نا بابت عمران خان و پی ٹی آئی نا کنے آ و کنا جماعت آ دوبہ غاک بے بنداو ئُ، عمران خان اخلاقیات و پاکستان نا سیاست ئِ بھس کننگ آ سلوک ئِ، اودے ہرجانہ نا نوٹس اس گدریفیوہ
اسلام آباد۔ 03اگست (اے پی پی) پاکستان مسلم لیگ (ن) خیبر پختونخوا نا صدر/وزیراعظم نا مسکوہی سلاہکار انجینئر امیر مقام پارینے کہ عائشہ گلالئی نا بابت عمران خان و پی ٹی آئی نا کنے آ و کنا جماعت آ دوبہ غاک بے بنداو ئُ عمران خان اخلاقیات و پاکستان نا سیاست ئِ بھس کننگ آ سلوک ئِ، تینا زی آ خلوک آ دوبہ غاتے کن عدالت آ کاوہ و اودے ہرجانہ نا نوٹس اس گدریفیوہ۔ داخیال آتا درشانی ئِ او پنچ شنبے نا دے داڑے نیشنل پریس کلب اٹی اسہ پریس کانفرنس اسے آن تران کرسا کرے۔ اوپارے کہ میڈیا ئِ گواہ جوڑ کرسا حلفا پاوہ کہ اینو اسکان عائشہ گلالئی تون نئے اوڑدہی اس ارے و نئے میٹنگ اس کرینٹ۔ عائشہ گلالئی قوم انا مسڑ ئِ اونا پریس کانفرنس آن پد بیرہ اوڑتون ہمدردی کن ٹیلی فون کریٹ ہرااسہ منٹ اس یا داکان ہم کم ہیت مس ہراٹی اودے سچ انا توار چست کننگ آ خراج تحسین پیش کریٹ و داکان زیات پین ہچ اس۔ اوپارے کہ عمران خان کنے آ دوبہ خلکونے کہ گورنر ہاﺅس اٹی بٹنگسا عائشہ گلالئی ئِ ای 50 کروڑ روپئی گدریفیٹ ، بالکل بے بنداو ئُ ہیت اسے۔ اوپارے کہ عمران خان ایلو تیا دوبہ خلنگ نا عادتی مسنے ولے ای دادے سگپرہ و تینا زی آ خلوک آ دوبہ غاتا بنداو آ اودے ہرجانہ نا نوٹس اس گدریفیوہ۔ انجینئر امیر مقام پارے کہ عمران خان نا اخلاقیات نا بابت ٹریک ریکارڈ غٹ انا مون آٹی ئِ، کیلیفورنیا نا عدالت آن ہلیس کے پی کے ٹی دے انا وخت انا باملنگ نا داستانک ہچ گہس آن ڈکوک افس و داوڑاٹ ننے انت ضرورت تما کہ نن عائشہ گلالئی آن داکاریم ئِ کرفین۔ کے پی کے نا وزیراعلیٰ نا گچین وڑاٹ حکمرانی ہرانا عمران خان صفت ئِ کرسا دم درینگپک اونا کرپشن نا داستانک ہم غٹ انا مون آٹی ئُ ، اونا صوبائی اسمبلی نا باسک و صوبائی کابینہ نا وزیرآک داداستان تے پاننگ ئُ و ڈی جی نیب پریس کانفرنس کرینے کہ ہراتم نن مائنز و سونامی بلین ٹریز معاملہ غا دوشاغنہ تو ننے توننگک۔ اوپارے کہ وخت اس داخہ اعتراف اونا تینا نمائندہ غاک کیر توننے انت ضرورت تما کہ داوڑنا دوبہ خلین و بے پتی اتین۔ اوپارے کہ مسلم لیگ (ن) قلعہ نا مانند سوگو ئِ ہراسٹ دانا پِننگ نا ہیت ئِ کریکہ اونا تینا پارٹی نا بندغ آک اودے اِلنگ ئُ۔ امیر مقام پارے کہ کنا میڈیا غان ہم خواست ئِ کہ او حق ئِ نشان ایتر و اونا دوبہ خلنگ نا پردہ ئِ پاش کیر تانکہ الس اونا حقی دروشم ئِ خننگ کیر۔ پریس کانفرنس اٹی خیبر پختونخوااسمبلی ٹی پارلیمانی لیڈر مسلم لیگ (ن) سردار نروٹہ ، باسک قومی اسمبلی شہاب الدین ، ایم پی اے سردار فرید ہم اوڑتون اوار ئسر۔
