بھارت نا ہمسایہ ملک آتیٹی ریاستی دہشت گردی و دہشت گرد آتا مالی کمکاری ڈیہہ نا امن کن خلیس اسے، پاکستان تینٹ بھارتی ریاستی دہشت گردی نا گواچی ئِ
اسلام آباد۔ 03 اگست (اے پی پی) پاکستان بھارت نا بے بنداو دوبہ غاتے مسترد کرسا پارینے کہ بھارت نا ہمسایہ ملک آتیٹی ریاستی دہشت گردی و دہشت گرد آتا مالی کمکاری ڈیہہ نا امن کن خلیس اسے، پاکستان تینٹ بھارتی ریاستی دہشت گردی نا گواچی ئِ۔ کشمیر نا ویل پاکستان و بھارت نا نیام اٹ بنداوی جھیڑہ ئِ، بھارتی ہٹ دھرمی نا سوب پاک بھارت تعلقداریک مشکل ئُ دور اسے آن گدرینگ انگ ئُ، نئی دہلی تون بامعنی مذاکرات خوانہ، اوغانستان اٹی حکومتی عملداری مفننگ آن داعش سوگو مننگ ئِ۔ پنچ شنبے نا دے ہفتہ وار پریس بریفنگ اٹی صحافی تا جتا سوج آتا ورندی ئِ ترسا دفترخارجہ نا ترجمان محمد نفیس ذکریا بھارتی وزیر خارجہ سشما سوراج نا کنڈآن پاکستان آ دہشت گردی نا دوبہ غاتیا سخت ردعمل نا درشانی ئِ کرسا بے بنداو دوبہ غاتے مسترد کرے و پارے کہ بھارت پاکستان و ہمسایہ ملک آتیٹی دہشت گردی کرفنگ و دہشت گرد آتا مالی کمکاری نا ڈوہ تیا پڑدہ شاغنگ نا بے سہب کوشست کننگ ئِ، بھارت پاکستان اٹی دہشت گردی و تخریبی کارروائی تیٹی اوار ئِ۔ ترجمان پارے کہ پاکستان تینٹ بھارتی ریاستی دہشت گردی نا گواچی ئِ۔ ترجمان پارے کہ کشمیر نا ویل پاکستان و بھارت نا نیام اٹ بنداوی جھیڑہ ئِ۔ او پارے کہ دوبہ خلنگ ہچ ئُ ویل انا ایسری اس اف، پاکستان کشمیر نا ویل اتون اوار ایسر نا چاری معاملہ غاتیا بھارت تون بامعنی مذاکرات کن تیار ئِ۔ اوپارے کہ بھارتی جارحانہ عزم ہمسایہ ملک آتون اوار غٹ ڈیہہ کن خلیس اسے۔ بھارتی ہٹ دھرمی نا سوب پاک بھارت تعلقداری مشکل ئُ دوراسے آن گدرینگ انگ ئُ۔ ترجمان پارے کہ پاکستان دہشت گردی آن غٹ آن زیات زہمی مسنے۔ پاکستان دہشت گردی نا برخلاف جنگ اٹی ہزار آ جان تے ندرکرینے وخت اس کہ ملک ئِ ارب آ ڈالر اقتصادی نسخان نا مون تروکی تما۔ اوغانستان نا بابت ترجمان پارے کہ پاکستان اوغانستان تون تعلقداری تے بے کچ اہمیت ایتک۔ اوغانستان تون تعلقداریک پاکستان نا فائدہ ٹی ئُ ولے اوغانستان اٹی اندرونی نزوری نا سوب داعش سوگو مننگ ئِ و ہموڑے داعش نا ساڑی گری پاکستان کن خلیس اسے۔ ڈیہہ نا غٹ ملک آتے اوغانستان اٹی داعش نا ساڑی گری آ گڑتی ئِ۔ اوپارے کہ داعش تون اوار ایلو دہشت گرد تنظیم آتون مون تننگ کن علاقائی ملک آتا خڑکی کمکاری نا گرج ئِ۔ دہشت گردی چائے پاکستان اٹی مرے یا پین جاگہ اس، بے کچ قابل مذمت ئِ۔ پاکستان اوغانستان اٹی امن و سوگوی نا خواہندار ئِ۔ دہشت گردی و اسمگلنگ نا توننگ کن پاکستان و اوغانستان نا نیام اٹ گچین بارڈر مینجمنٹ نا گرج ئِ۔ اوپارے کہ بھارت نئے بیرہ اسلام آباد اٹی اڈ ہلوک آ سارک سروک دیوان ئِ لتاڑا بلکن داتنظیم ئِ ناقابل تلافی نسخان ہم رسینگا۔ ترجمان کشمیر نا بابت اسہ سوج اسے نا ورندی ئِ ترسا پارے کہ مقبوضہ کشمیر اٹی بھارت نا ریاستی دہشت گردی کاٹم آٹی ئِ۔ کشمیر نا ویل ہڑتوم آ ملک آتا نیام اٹ بنداوی جھیڑہ ئِ۔ پاکستان بھارت تون کشمیر نا ویل اتون اوار غٹ ایسر نا چاری معاملہ غاتا مذاکرات نا کمک اٹ ایسر کننگ کن تیار ئِ۔ جموں و کشمیر جہانی تسلیم شدہ جھیڑہ ئِ۔ سندھ طاس معاہدہ غا پاک بھارت سیکرٹری کہول انا مذاکرات نا اولیکو مرحلہ جہانی بینک انا ہیڈکوارٹر اٹی مس وخت اس کہ مذاکرات نا بروک آ مرحلہ بروک آ تُو واشنگٹن اٹی مریک۔ ترجمان امریکی نمائندہ خصوصی ایلس ویلز نا دورہ پاکستان نا بابت اسہ سوج اسے نا ورندی ئِ ترسا پارے کہ امریکی ڈل انا دور ہ پاکستان گچین مس ہراٹی کشمیر تون اوار غٹ معاملہ غاتیا ہیت و گپ کننگانے۔ اونا پاننگ ئس کہ ایلس ویلز نا دورہ پاکستان امریکہ نا ڈیہہ نا بابت پالیسی نا جاچ انا رداٹئِ، امریکی نمائندہ خصوصی نا دورہ پاکستان ، ڈیہہ نا بابت امریکی پالیسی نا جوڑ کننگ کن ئِ وخت اس کہ امریکی ڈل اتون کشمیر نا ویل ، بھارت نا کنڈآن انسانی حق انا خلاف ورزی ، اوغان حالیت آتون اوار غٹ معاملہ غاتیا خیال آتا درشانی ئِ کننگا۔ دہلی ٹی پاکستان نا مسکوہی ہائی کمشنر عبدالباسط نا ریٹائرمنٹ نا بابت ترجمان پارے کہ اونا وخت آن مست ریٹائرمنٹ انتظامی ئُ معاملہ اسے وخت اس کہ عبدالباسط جندی سوب آتیا وخت آن مست سبکدوشی اختیار کرے۔ اوپارے کہ اونا جاگہ غا ترکی ٹی تعینات سہیل محمود بھارت اٹی بطور ہائی کمشنر خذمت سرانجام ایتک۔
