اونا سروکی ٹی پاکستان نا حکومت قومی سیوت و سوگوی ئِ برقرار تخنگ، اقتصادی و راجی شونداری ئِ مون آدننگ کن پرعزم سلک، ترجمان چینی وزارت خارجہ
اسلام آباد۔ 02 اگست (اے پی پی) چین شاہد خاقان عباسی ئِ پاکستان نا وزیراعظم گچین مننگ آمبارکبادی ترسا پارینے کہ اونا سروکی ٹی پاکستان نا حکومت قومی سیوت و سوگوی ئِ برقرار تخنگ و اقتصادی و راجی شونداری ئِ مون آ دننگ کن پرعزم سلک۔ چارشنبے نا دے چینی وزارت خارجہ نا ترجمان گنگ شوانگ نا کنڈآن جاری اسہ بیان اسے نا رداٹ چین شاہد خاقان عباسی ئِ وزارت عظمیٰ نا عہدہ ئِ سنبھالنگ آ مبارکبادی تسنے۔ چین نا پاننگ ئِ کہ ننے یخین ئِ کہ پوسکن گچین مروک آ وزیراعظم شاہد خاقان عباسی نا سروکی ٹی پاکستانی حکومت قومی سیوت و سوگوی ئِ برقرار تخنگ و اقتصادی و راجی شونداری ئِ مون آ دننگ کن پرعزم سلک۔ ترجمان پارے کہ چین پاک۔ چین تعلقداری نا ترندی اٹ ودوک آ رفتار ئِ برقرارتخنگ، سی پیک نا شونداری و چین۔پاکستان سدابہار اسٹریٹجک پارٹنر شپ ئِ پین مون آ دننگ نا غرض اٹ پاکستان تون کاریم کننگ کن تیار ئِ۔
