حکومت نا پالیسی تے برقرارتخنہ، کابینہ آ صلابت مسنے، بروک آ اسہ اِرادے اٹی کابینہ سوغند ہرفک، کابینہ نا سوغندی دودآن پد نواز شریف لاہور آ کاہک، سی پیک، زرکاری، توانائی نا ڈٹ، ڈیم و موٹروے تتون اوار ایلو ڈٹ آتے مست آن ہم ترند رفتاری اٹ پورو کننگک
مری۔02 اگست (اے پی پی) وزیراعظم شاہد خاقان عباسی پارینے کہ جمہوری تسلسل ئِ چاردے اٹی بھلو گیشتری اسے اٹ بحال کرینن، حکومت نا پالیسی تے برقرار تخنہ، کابینہ غا صلابت مسنے، بروک آ اسہ اِرادے اٹی کابینہ سوغند ہرفک، کابینہ نا سوغندی دود آن پد نواز شریف لاہور آ کاہک۔ چارشنبے نادے مری ٹی مسلم لیگ (ن) نا بنجائی راہشون خواجہ محمد آصف، احسن اقبال، خواجہ سعد رفیق، مشاہد اللہ خان و ایلوفتے تون اوار میڈیا تون ہیت وگپ کرسا شاہد خاقان عباسی پارے کہ پارٹی نا سینئر راہشون آتون کابینہ نا جوڑ کننگ تون اوار ایلو معاملہ غاتیا خیال آتا درشانی مسنے، بروک آ اسہ اِرا دے اٹی کابینہ سوغند ہرفک۔ اوپارے کہ ملک اٹی سی پیک ، زرکاری ، توانائی نا ڈٹ، ڈیم و موٹروے تتون اوار ایلو ڈٹ آتے مست آن ہم ترند رفتاری اٹ پورو کننگک، دنیا ئِ پاننگ کینہ کہ وزیراعظم بدل مننگ کیک ولے پالیسی تا تسلسل برقرار سلک۔ اوچوہدری نثارعلی خان نا کابینہ ٹی اوار مننگ نا بابت اسہ سوج اسے نا ورندی ٹی پارے کہ دابابت صلابت جاری ئِ۔ محمد نواز شریف تون ہم پوسکن آ کابینہ نا بابت صلابت مسنے۔ او مسکوہی وزیراعظم محمد نواز شریف نا لاہور آ ہننگ نا بابت اسہ سوج اسے نا ورندی ٹی پارے کہ کابینہ نا جوڑ کننگ نا مرحلہ غان پد ہی نواز شریف لاہور آ کاہک۔ اوپارے کہ مسلم لیگ (ن) نواز شریف نا خورک مروک آ نشست آ بھلو گیشتری اسے اٹ سرسہبی دوئی کیک۔ او مہالوآنبار تینا حلقہ ٹی ہِننگ نا بابت اسہ سوج اسے نا ورندی ٹی پارے کہ نمے معلوم ئِ کہ ہمیشہ کنا تینا حلقہ آن خڑکی رابطہ مریک ولے ساڑی آ حیثیت اٹی سیکورٹی نا گرج ئِ، دا ہچ ئُ پروٹوکول نا معاملہ اس اف ۔
