گچین کاری اصلاحات بل ہندا دیوان اٹی پیش مریک، بل انا منظوری آن پد الیکشن کمیشن ہم تینا کاریم نا بنائِ کیک
اسلام آباد۔ 02 اگست (اے پی پی) اسپیکر قومی اسمبلی سردارایاز صادق پارینے کہ گچین کاری اصلاحات بل ہندا دیوان اٹی پیش مریک، بل انا منظوری آن پد الیکشن کمیشن ہم تینا کاریم نا بنائِ کیک ، شیخ رشید تینے خبر اس جوڑ کننگ خواہسکہ ہنداخاطران او سپیکر لفٹ و پارکنگ نا کاریم اٹ اتنگ نا بابت کنا پیشکش ئِ قبول کتو۔ چارشنبے ناد ے تینا چیمبر اٹی سینئر صحافی تتون ہیت وگپ کرسا سردارایاز صادق پارے کہ شیخ رشید ئِ ہروڑنا رکھ تننگ نا کوشست کرین۔ شیخ رشید تینٹ خبر اس جوڑ مننگ و جوڑ کننگ خواہسکہ ہنداخاطران او کنا خواست انا باوجود اسپیکر لفٹ وپارکنگ ئِ کاریم اٹ اتو۔ قومی اسمبلی نا سیکورٹی عملہ ئِ نن خصوصی پارت تسوسن کہ شیخ رشید ئِ سیکورٹی سیبو ٹی گاڈی اسکان سرکننگے ولے او ننا پیش کش ئِ امنا کتو۔ ننا سیکورٹی اسٹاف تینٹ دِکہ کُنگولے شیخ رشیدئِ بحفاظت گاڈی اسکان سرکرے۔ اسہ سوج اسے نا ورندی ٹی اوپارے کہ گچین کاری اصلاحات بل انا مسودہ ہندادیوان اٹی منظوری کن پیش کننگک۔ بل انا منظوری آن پد الیکشن کمیشن ہم تینا کاریم نا بنائِ کیک۔ تدوک آ دے وزیراعظم نا گچین کاری نا وخت آ مہمان تا گیلری ٹی دھکم پیل و بدنظمی نا بابت اسہ سوج اسے نا ورندی ٹی اوپارے کہ پریس گیلری بیرہ صحافی تے کن ئِ، غیر تعلقدار بندغ آتے داخلہ آن توننگ کن نن احکامات جاری کرینن۔ اوپارے کہ موبائل فون انا کمک اٹ دیوان نا فوٹیج ئِ جوڑ کننگ آپابندی ئِ ، نن آخریکو وارننگ ئِ جاری کننگ اُن۔ ہرا چینل باز بتو اونا تعلقدار رپورٹر نا پترینگ انگ ئِ بند کننگک۔
