اسلام آباد۔ 02 اگست (اے پی پی) اسلام آباد چیمبر آف سمال ٹریڈرز نا سرپرست شاہد رشید بٹ پارینے کہ کاروباری برادری حکومت نا کنڈآن اِر اپین ایل این جی ٹرمینل نا اڈتننگ نا فیصلہ نا پبی مخ تفی ئِ کیک۔ نجی بشخ انا کمک اٹ پورٹ قاسم آ اڈ تروک آ دا ٹرمینل ہردے 1.6 ارب مکعب میٹر گیس پراسس کننگ کیرہ ہراڑآن توانائی تنکی کم وود چٹک۔ ملک اٹی سہی وڑاٹ ایل این جی درستی راستی کرفنگ نا کریڈٹ وزیراعظم شاہد خاقان عباسی ئِ کاہک ہراڑآ کاروباری برادری اونا منت وارئُ۔ شاہد رشید بٹ تینا اسہ بیان اسے ٹی پارے کہ گوادر آخبت نا اسہ بھلوصنعتی و واپاری بنجاءاس مریک ہنداخاطران حکومت ہموڑے ٹرمینل جوڑ کپننگ نا فیصلہ غا دُوارہ سجفک تانکہ بلوچستان اٹی صنعتی شونداری ئِ المی جوڑ کننگ مرے۔ اوپارے کہ ساڑی حکومت نا کوشست توانائی نا طلب و رسد اٹی توازن نا بنائِ ہراڑآن توانائی نا منظرنامہ بدل مریک۔ اوپارے کہ حکومتی گام گیج آتیان پنجاب نا صنعت و سی این جی انڈسٹری ئِ پوسکن ئُ زند اس ملانے ہراڑآن زرکاری رکھ، لکھ آ بندغ آتے روزگار و تیل انا درآمدی بل اٹی کمتی بننگ ئِ۔
