راولپنڈی۔ 02 اگست (اے پی پی) بری فوج انا سروک جنرل قمر جاوید باجوہ زور شاغاکہ پاک فوج ملک آن دہشت گردی نا چٹفنگ و سیم تے پین رکھ جوڑ کننگ کن تینا کوشست آتے برجاتخے، لمہ وطن نا رکھ اٹی جان تے ندر کروک آ پاک فوج انا شہید آتا خون ئِ وخت اس ہم گیرام کپنہ۔ او چارشنبے نا دے بلوچ رجمنٹ کانفرنس آن تران کریکہ۔ پاک فوج انا شعبہ تعلقات عامہ(آئی ایس پی آر) نا رداٹ خصوصی اِرا دے ئی بلوچ رجمنٹ کانفرنس ، بلوچ رجمنٹ سینٹر ایبٹ آباد اٹی اڈ ہلک۔ آرمی چیف جنرل قمر جاوید باجوہ بلوچ رجمنٹ نا کیہی سال آتا گچین کارکڑد نا ستائِ کرے۔ او لمہ وطن نا دفاع و ملک ئِ سوگو کننگ کن پاک فوج انا قربانی تا ستائِ کرسا شہید آتاخاہوت آتا یخین دہانی ئِ کرفے کہ شہید آتا خون ئِ وخت اس ہم گیرام کپنہ۔ آرمی چیف زور شاغاکہ پاک فوج دہشت گردی نا چٹفنگ و سیم تے پین رکھ جوڑ کننگ کن تینا کوشست آتے برجاتخے۔ اوقوم انا خذمت کن پاک فوج اٹی ایمان ، کسبی مہارت و ہمت نا بڑزکو انگا معیار آتا خواست ئِ کرے۔ بری فوج انا سروک جنرل قمر جاوید باجوہ بلوچ رجمنٹ اٹی یات گار شہداءغا حاضری تس و پھل آتا چادراس شاغا و لمہ وطن نا رکھ اٹی شہید مروک آتے خراج عقیدت پیش کرے۔ کورکمانڈر راولپنڈی لیفٹیننٹ جنرل ندیم رضا، بلوچ رجمنٹ نا ریٹائرڈ و حاضر سروس افسران بشمول مسکوہی آرمی چیفس جنرل اسلم بیگ، جنرل اشفاق پرویز کیانی، مسکوہی چیئرمین جوائنٹ چیفس آف اسٹاف کمیٹی جنرل طارق مجید و جنرل راشد محمود وائیں ئسک ہم داوخت آ ساڑی ئسر۔
