مسلم لیگ (ن) نا راہشون سینیٹر مشاہداللہ خان نا پارلیمنٹ ہاﺅس نا پیشن میڈیا تون ہیت وگپ

شاہد خاقان عباسی نواز شریف نا شونداری ڈٹ آتا تسلسل و پارٹی منشور ئِ ہلسا چلینگک، عمران خان لغور ئُ بندغ اسے، او وخت اس ہم شکار کننگ کپک
اسلام آباد۔ 01 اگست (اے پی پی) مسلم لیگ (ن) نا راہشون سینیٹر مشاہد اللہ خان پارینے کہ پندار عبوریوزیراعظم شاہدخاقان عباسی نواز شریف نا جاری شونداری ڈٹ آتا تسلسل و پارٹی منشور ئِ ہلسا چلینگک۔ عمران خان لغور ئُ بندغ اسے او وخت اس ہم شکار کننگ کپک۔ سے شنبے نا دے پارلیمنٹ ہاﺅس نا پیشن میڈیا تون ہیت وگپ کرسا اوپارے کہ جمہوریت اٹی بندغ آتا داخہ اہمیت مفک بلکن سسٹم ئِ اہمیت تننگک۔ شاہد خاقان عباسی مسکوہی وزیراعظم محمد نواز شریف نا جاری شونداری ڈٹ آتا تسلسل ئِ برجاتخک۔ پارلیمانی پارٹی نا دیوان اٹی غٹ باسک آتا سلاہ ئِ یکجا کرسا فیصلہ کننگا ، غٹ باسک آک عبوری وزیراعظم کن شاہد خاقان عباسی نا پن آ اتفاق کریر۔ مشاہد اللہ خان پارے کہ عمران خان لغور ئُ بندغ اسے او شکار کننگ نا چمب ئِ تپک او ارٹ میکو وار اسمبلی ٹی بس ولے ملک انا شونداری و شونہالی تون اودے ہچ ئُ است خواہی اس اف۔ اوہمیشہ منفی سیاست کرے ہرانا سوب تینٹ ہم سیاست اٹی بے سہب مس۔