سید نوید قمر 47، شیخ رشید احمد 33 و صاحبزادہ طارق اللہ 4وونٹ ہلک
پوسکن آ گچین مروک آ وزیراعظم شاہد خاقان عباسی نتیجہ غاتا پڑو آن پد تینا حریف اومیت دار آتا نشست آتیا ہنا و اوفتے تون جوڑ بڑکرے
اسلام آباد۔ 01 اگست (اے پی پی) مسلم لیگ (ن) و سیوتی جماعت آتا اومیت دار شاہد خاقان عباسی 221 وونٹ ہلسا قائد ایوان گچین مس ۔ او ملک انا 22می گچین مروک وخت اس کہ جم وڑاٹ 28می وزیراعظم گچین مسنے۔ سے شنبے نا دے قومی اسمبلی نا 44می دیوان اٹی پوسکن آ قائد ایوان نا گچین کاری کن وونٹنگ مس ہراٹی چار اومیت دار آتا نیام اٹ مقابلہ مس ہرافتے ٹی پیپلزپارٹی نا اومیت دار سید نوید قمر 47 وونٹ ہلک، عوامی مسلم لیگ نا سروک و تحریک انصاف نا مخ تفوک اومیت دار شیخ رشید 33 وخت اس کہ جماعت اسلامی نا اومیت دار صاحبزادہ طارق اللہ 4وونٹ ہلک۔ عوامی نیشنل پارٹی و بلوچستان نیشنل پارٹی گچین کاری عمل اٹی بشخ ہلتوس۔ قومی اسمبلی ٹی پوسکن آ قائد ایوان نا گچین کاری کن قومی اسمبلی نا ہال پولنگ اسٹیشن نا وڑاٹ کاریم اٹ بس۔ اومیت دار آتے کن 4گیلری جتا کننگا۔ شاہد خاقان عباسی کن لابی اے ، سید نوید قمر کن لابی بی، شیخ رشید احمد کن لابی سی و صاحبزادہ طارق اللہ کن لابی ڈی ئِ جتا کننگاسس۔ دا گیلری تا کسر آ قومی اسمبلی سیکرٹریٹ نا عملہ باسک آتا اندراج ئِ کریکہ اوکان پد دا باسک آک لابی ٹی تولوک ئسر۔ اوکان پد پولنگ نا ایسری آ وونٹ آتا حساب ئِ کرفنگا۔ مسلم لیگ (ن) نا اومیت دار شاہد خاقان عباسی ئِ متحدہ قومی موومنٹ ، جے یو آئی (ف) ، مسلم لیگ (فنکشنل) ، پختونخوا عوامی پارٹی ، فاٹاآن آزاد باسک، مسلم لیگ (ضیائ) نیشنل پیپلزپارٹی، نیشنل پارٹی بلوچستان، آل پاکستان مسلم لیگ نا مخ تفی دوئی ئس۔ وونٹ آتا گنتی پورو مننگ آن پد اسپیکر باسک آتے ایوان اٹی پدی بٹنگا اوکان پد اونتیجہ غاتا پڑو ئِ کرے۔ مسلم لیگ (ن) نا گڑاس باسک مسکوہی وزیراعظم محمد نوازشریف نا عکس آتا پورٹریٹ ئِ ہم ایوان اٹی تین تون ایسور۔ کل 342نا ایوان اٹی 305باسک آک وونٹ آتا حق ئِ کاریم اٹ ایسور ۔ تحریک انصاف نا سروک عمران خان ساڑی ہلو۔ اسپیکر نا کنڈآن پڑو آن پد قومی اسمبلی ہال اٹی ساڑی مسلم لیگ (ن) نا باسک آک ”وزیراعظم محمد نواز شریف“ نا فلک شگاف نعرہ ئِ خلکر۔ پوسکن گچین مروک آ وزیراعظم شاہد خاقان عباسی نتیجہ غاتا پڑوآن پد تینا حریف اومیت دار سید نوید قمر، شیخ رشید احمد، صاحبزادہ طارق اللہ نا نشست آتیا ہنا و اوفتے تون جوڑ بڑکرے۔ داٹی باسک آک شاہد خاقان عباسی ئِ وزیراعظم گچین مننگ آ مبارکباد ی ہم تسر۔ اوکان پد اسپیکر قومی اسمبلی اودے دعوت تس کہ او قائد ایوان نا نشست ئِ سنبھالے ہراڑآ او قائد ایوان نا نشست آ ہنا توس۔
