ایوان نا غٹ آن بھلا کاریم ئِ کہ او تینا تقدس و عزت ئِ بحال کے، اپوزیشن، فوجی ، انٹیلی جنس ادارہ ، عدلیہ کاروباری بندغ آتون اوار غٹ ادارہ غاک اسہ کشتی نا سواری ئُ، کشتی ٹی ٹُنگ اس مس تو غٹ ڈبنگرہ
اسلام آباد۔01اگست (اے پی پی) پوسکن گچین مروک آ وزیراعظم شاہد خاقان عباسی پارینے کہ ایوان نا غٹ آن بھلا کاریم ئِ کہ او تینا تقدس و عزت ئِ بحال کے، اپوزیشن ، فوج ، انٹیلی جنس ادارہ، عدلیہ ، کاروباری بندغ آتون اوار غٹ ادارہ غاک اسہ کشتی نا سواری ئُ، کشتی ٹی ٹُنگ اس مس تو غٹ ڈبنگرہ، 45دے اکن بسونٹ یا 45گھنٹہ کن، 45توانا کاریم ئِ کیوہ کاوہ، آٹومیٹک سلہہ غاتا غٹ لیسن آتے پدی ہلسا خلقت ئِ پیسہ غاتے پدی تننگے، ملک اٹی معیاری تعلیم نا سخت گرج ئِ، وسیلہ غاتیٹی سلسا معیاری ہسپتال جوڑ کینہ ، بے نظیر انکم سپورٹ پروگرام نا دنگ ئِ ہم ودفنگک، یکم نومبر آن پد ملک اٹی ہچ ئُ لوڈشیڈنگ اس مفک۔ موٹرویز و ریلویز نا گچین نظام اس جوڑ کینہ، نواز شریف نا کراچی ئِ پیکج تننگ نا وعدہ ئِ پورو کینہ۔ خراج تننگ ہچ ئُ آپشن اس اف بلکن کانودی گرج اسے، خراج تفروک آتا رند ئِ الیپنہ، الس نا وزیراعظم نواز شریف ئِ ، اونا قصوردادے کہ او ملک ئِ ایٹمی واک اس جوڑ کرے و معاشی وڑاٹ سوگو کرے ، نن سپریم کورٹ نا فیصلہ ئِ من و عن اٹ امنا کرین، ولے پاکستان نا الس دافیصلہ ئِ مسترد کرینے، مخالف آک ہم شاہدی ایترہ کہ نواز شریف وخت اس ہم کرپشن کتنے، یخین ئِ کہ ملک انا حقی وزیراعظم تینا سیٹ آ ضرور پدی بریک، اسہ بھلو عدالت اس لگنگ والا ئِ ہراٹی مخالف آک ہم شاہدی ایترہ کہ نواز شریف وخت اس کہ کرپشن کتنے۔ سے شنبے ناد ے قومی اسمبلی ٹی وزیراعظم گچین مننگ آن پد تینا اولیکو تران اٹی شاہد خاقان عباسی پارے کہ قائد ایوان نا گچین کاری نا جمہوری عمل اٹی بشخ ہلنگ آ غٹ باسک آتا منت واراُٹ ۔ داجمہوری ئُ وڑاسے ہرا اینو تینا کننگانے۔ اوپارے کہ تینا جماعت مسلم لیگ (ن) نا پارلیمانی پارٹی نا منت واراُٹ ہرادا منصب کن اودے جوان سمجھا۔ ای غٹ وونٹ تروک آتاہم منت واراُٹ و اپوزیشن نا ہم منت واراُٹ ولے غٹ آن مست الس نا وزیراعظم نواز شریف نا منت وار اُٹ ہرا کنے دا منصب کن پندار کرے۔ ہموغٹ حلیف جماعت آتا ہرافک ننتون تفیر ننے وونٹ تسر، اوفتا منت وار اُٹ۔ پی ٹی آئی نا سروک عمران خان وپارلیمانی سروک نا منت وار اُٹ ہرا ہردے نا کرینگ اٹی ننے اوار کیک۔
