اسلام آباد۔ 31جولائی (اے پی پی) صدر مملکت ممنون حسین وطن عزیز آن ٹی بی نا مرض انا چٹفنگ و دانا توننگ کن پبی گام گیج آتا گرج آ زور شاغسا پارینے کہ حکومت تون راجی تنظیمک الس ئِ جان جوڑی نا گچین آسراتی فراوان کننگ کن تینا کڑد ئِ ادا کننگ کیرہ۔ اوداہیت ئِ دوشنبے نا دے انڈس ہیلتھ نیٹ ورک نا چیف ایگزیکٹو آفیسر ڈاکٹر عبدالباری تون ایوان صدر اٹی ہیت وگپ کرسا پارے۔ چیف ایگزیکٹو آفیسر ڈاکٹر عبدالباری صدر مملکت ئِ ٹی بی نا بارواٹی بریفنگ ترسا پارے کہ پاکستان ٹی بی نا مریض آتا لحاظ اٹ دنیا نا پنچ میکو بھلا ملک ئِ۔ ڈاکٹر عبدالباری پارے کہ پاکستان اٹی داوخت ٹی بی نا مسہ لکھ آن زیات مریض ئُ و ہرسال 10 ہزار مریض آتا پین ودکی مننگ ئِ۔ اوصدر مملکت ئِ پارے کہ او کراچی آن ٹی بی نا چٹفنگ کن دا تُو آن مہم نا بناءِ کننگ ئِ۔ صدر مملکت پارے کہ پاکستان کون آ شون ہلوک ملک اٹی حکومت تون راجی تنظیمک الس ئِ جان جوڑی نا گچین آسراتی فراوان کننگ کن تینا اہم کڑد ئِ ادا کننگ کیرہ۔ اوپارے کہ انڈس ہیلتھ نیٹ ورک تنظیم نا خذمت آک دا مسخت کن بھاز اہم ئُ۔ صدر مملکت ڈاکٹر عبدالباری ئِ دانا مسخت نا سرپرستی و مخ تفی نا باوری ترفے۔ صدر مملکت پارے کہ حکومت، جہانی تنظیم، این جی اوز، ہندی تنظیم و ایلو اسٹیک ہولڈرز آتا کمک نا بیدس ٹی بی کون آ خراب انگا مرض انا چٹفنگ ناممکن ئِ۔ اوداعزم انا درشانی ئِ کرے کہ ننا اسیجائی کوشست آتیان آخبت اٹی ٹی بی نا چٹفنگ المی مریک۔
