اسلام آباد۔ 31جولائی (اے پی پی) پاک چین صنعتی کمکاری اٹ پاکستان ڈیہہ ٹی پیداواری بنجاءاس جوڑ مریک، صنعتی زون تا اڈتننگ آن ہندی صنعت کار آتے کن زرکاری نا بے شمار وارخواہی ودی مریک، چین نا صنعت پاکستانی صنعت کن خلیس اس آخا بلکن آزموندہ مہارت و ہیل کننگ نا وارخواہی اتیک۔ چینی صنعت آتا پاکستان اٹی گدریفنگ آن پاکستان نا صنعتی بشخ سوگو مریک، چینی صنعت آتا پاکستان اٹی گدریفنگ آن بے روزگاری چٹک، چندی بشخ آتیٹی اسہ ایلو ئِ معلومداری ومہارت اٹی ودکی مریک۔ دوشنبے نا دے وزارت ڈٹ بندی شونداری نا کمامدارآک اے پی پی ئِ پاریر کہ ملک انا ہرچارآصوبہ، گلگت بلتستان ، فاٹا و آزاد کشمیر اٹی 9 صنعتی زون جوڑ کننگک۔ اوپاریر کہ پاک چین صنعتی کمکاری نا رداٹ صوبہ غاتا کنڈآن گچین 9 زون تا اوار مننگ نا فیصلہ مس، دامسخت کن صوبہ غاک چندی ہند آتا پیدواری ئِ کریسر ہرافتے ٹی خیبر پختونخوا نا کنڈآن رشکئی اکنامک زون و سندھ انا کنڈآن چائنہ اکنامک زون دھاریجی، بلوچستان نا کنڈآن بوستان اکنامک زون و پنجاب نا کنڈآن چائنہ اکنامک زون شیخوپورہ، گلگت بلتستان نا کنڈآن مقپون داس گلگت وخت اس کہ کشمیر نا کنڈآن بھمبر صنعتی زون ئِ اوار کننگ نا سلاہ تننگاسس۔ بنجائی دارالحکومت اسلام آباد اٹی آئی سی ٹی ماڈل انڈسٹریل زون و پورٹ قاسم اٹی پاکستان اسٹیل مل انا ڈغار آ انڈسٹریل پارک اس جوڑ کننگ وخت اس کہ فاٹا نا کنڈآن مومند ماربل انڈسٹریل زون اس جوڑ کننگک۔ سی پیک نا ارٹ میکو مرحلہ ٹی چین نا کمک اٹ پاکستان اٹی صنعتی زون اڈ تننگک۔ اوپاریر کہ صنعتی شونداری نا مون آ دننگ پاک چین اقتصادی راہداری نا چارمیکو اہم انگا تمبہ ئِ۔ پاکستان و چین نا نیام اٹ صنعتی کمکاری ٹی ہندی صنعت ئِ مون آ دننگ و پیداواری لائخی ٹی ودکی مریک، صنعتی کمکاری ٹی چین نا صنعت آک ایلو ملک منتقل مننگ نا بیدس پاکستان آ منتقل مریرہ۔
