اسلام آباد۔ 27جولائی (اے پی پی) مسلم لیگ (ن) نا اومیت دار ڈاکٹر آصف کرمانی نا پنجاب آن سینیٹ نا جنرل نشست آ بے مقابلہ سینیٹر گچین مننگ نا گمان ئِ۔ دامقابلہ ٹی آزاد اومیت دار نا کنڈآن جمع کرفوک آ پندار کاغد آتے مسترد کننگانے ولے دا فیصلہ نا برخلاف خواست انا اومیت دار ئِ حق ارے۔ پنچ شنبے نا دے صوبائی الیکشن کمشنر پنجاب لاہور اٹی سینیٹر ظہرالدین بابر اعوان نا استیفہ آن خورک مروک آ سینیٹ نا جنرل نشست آ پندارکاغد آتا سکروٹنی نا مرحلہ انجام ہلک۔ سینیٹ نا دا نشست آ مسہ اومیت دار پندارکاغد آتے جمع کرفیسر ہرافتے ٹی پاکستان مسلم لیگ (ن) نااِرااومیت دار آصف سعید کرمانی و محمد نعمان وخت اس کہ آزاد اومیت دار سرفراز قریشی اوار ئُ۔ جانچ پڑتال اٹی آصف کرمانی ومحمد نعمان نا کاغد آک بیدس اعتراض آن منظور کننگار آزاد اومیت دار سرفراز قریشی نا کاغد آک تجویز کنندہ و تائید کنندہ مفننگ نا سوب نامنظور گوندنگار۔ داٹی پاکستان مسلم لیگ(ن) نا اومیت دار محمد نعمان پندار کاغد آتے پدی ہلنگ نا درخواست آ ریٹرننگ آفیسر تون جمع کرفے ہرامنظور کننگار۔ الیکشن کانود سیکشن 15نا رداٹ اومیت دار سکروٹنی نا وخت یاالیکشن شیڈول اٹی پندارکاغد آتا پدی ہلنگ نا تاریخ اسکان تینا کاغد آتے پدی ہلنگ نا درخواست ئِ ریٹرننگ آفیسر تون جمع کرفنگ کیرہ۔
