اسلام آباد۔ 27جولائی (اے پی پی) بنجائی وزیر خزانہ سینیٹر اسحاق ڈار پارینے کہ مخالف آتیان پاکستان نا شونداری و شونہالی ہضم مفننگ ئِ، گدرینگوک آ چارسال اٹی پاکستانی معیشت نمان شون ہلکونے، جہانی ادارہ غاک ہم پاکستانی معیشت اٹی گچینی نا معترف ئُ، نن پاکستان ئِ اقتصادی وڑاٹ وت واجہ جوڑ کرینن۔ او پنچ شنبے نا دے داڑے ایف بی آر ہیڈ کوارٹرز اٹی چارمی پارلیمنٹرینز خراج ڈائریکٹری نا اجراءنا دود آن تران کریکہ۔ اوپارے کہ گدرینگوک آ چارسال اٹی پاکستانی معیشت نمان شون ہلکونے، نن پاکستان ئِ اقتصادی وڑاٹ وت واجہ جوڑ کرینن۔ اوپارے کہ جہانی ادارہ غاک ہم پاکستانی معیشت نا گچینی نا معترف ئُ۔ اسحاق ڈارپارے کہ (اوپن گورنمنٹ پارٹنر شپ) اوجی پی نا رکنیت نا دوئی کن پونے اِراسال سخت خواری کرینن، داکلب نا ممبرشپ اس اف کہ اپلائی کرین و ملا۔ داوخت آ وزیر خزانہ پارلیمنٹرینز خراج ڈائریکٹری نا باضابطہ اجرائِ کرے۔ پاکستان مسلم لیگ ن نا حکومت نا کنڈآن پدریسہ چارمیکو سال پارلیمنٹ نا باسک آتا خراج ڈائریکٹری ئِ جاری کننگانے۔ خراج ڈائریکٹری ٹی 1010 پارلیمنٹ نا باسک آتا خراج آتا بابت سرجم آک اوار ئُ ہرا ایف بی آر نا ویب سائٹ آ دستیاب ئُ۔ گدرینگوک آسال 996 پارلیمنٹ نا باسک نا خراج سرجم آتے ڈائریکٹری ٹی شائع کننگاسس۔ ایلو پارلیمنٹ نا باسک آتے اسہ تُو انا ودکی وخت تننگانے تانکہ او تینا خراج سرجم آتا اندارج ئِ کرفنگ کیر۔ یات سلے کہ پاکستان دنیا نا چارمیکو ملک ئِ ہراپارلیمنٹ نا باسک آتا خراج ڈائریکٹری ئِ شائع کرینے۔ داوخت آ پاننگاکہ ساڑی حکومت نا گدرینگوک آ چارسال اٹی خراج وصولی تیٹی 73درسد ودکی ریکارڈ کننگا نے۔ خراج ڈائریکٹری نا جاری کننگ نا دود آتیٹی وزیراعظم نا خصوصی کمکار ریونیو ہارون اخترخان ، چیئرمین ایف بی آر و ایلو کمامدارآک ہم ساڑی ئسر۔
