داہیت انا ناقابل تردید شاہدی ساڑی ارے کہ ننا دے ٹکی ہمسایہ ملک پاکستان اٹی دہشت گردی و دہشت گرد آتا مالی کمکاری ئِ کننگ ئِ،
اسلام آباد۔ 27جولائی (اے پی پی) دفترخارجہ پارینے کہ داہیت انا ناقابل تردید شاہدی ساڑی ارے کہ ننا دے ٹکی ہمسایہ ملک اناریاستی عنصر آک پاکستان اٹی دہشت گردی و دہت گرد آتامالی کمکاری و پاکستان نا برخلاف تینا ایلو ملک آتا گل زمین ئِ کاریم اٹ اتنگ ئُ۔ اوغان سیکورٹی فورس آتا کنڈآن آپریشن اٹی پاکستانی سفارتی عملہ نا بحفاظت بازیابی آخوشی مس ، پاکستان آ دوبہ خلنگ دہشت گردی نا غرض آن کوشست آتے کن نسخان دہ ئِ۔ پاکستان دہشت گردی نا برخلاف جنگ اٹی بے پناہ جانی و مالی قربانی تسنے۔ مقبوضہ کشمیر اٹی بھارتی بیدادی و انسانی حق انا سنگین خلاف ورزی تے اقوام متحدہ تون اوار جہانی کہول آ تالان کرسا کیک۔ داہیت آتے دفترخارجہ نا ترجمان محمد نفیس ذکریا پنچ شنبے نا دے ہفتہ وار پریس بریفنگ اٹی صحافی تا جتا سوج آتا ورندی ئِ ترسا پارے۔ ترجمان مدرسہ غاتیٹی خوانوک آ طالب علم آتے اوغانستان اٹی تخریب کاری کن کاریم اٹ اتنگ نا بابت اوغان حکومت نا دوبہ غاتے مسترد کرساپارے کہ پاکستان نا اوغانستان ئِ تعلیمی بشخ اٹی کمکاری نا فراوانی ٹی نمان کڑد ئِ، کم وود 50ہزار اوغان طالب علم پاکستان نا تعلیمی ادارہ غاتیان بڑزکو تعلیم حاصل کرینو ہراداسہ تینا ملک اٹی ملازمت کننگ ئُ وخت اس کہ مسہ ہزار آن زیات اوغان طالب علم پاکستانی اسکالر شپ اٹ داڑے تعلیم ئِ پورو کریر و حکومت پاکستان پین مسہ ہزار اوغان طالب علم آتے پاکستان نا تعلیمی ادارہ غاتیٹی اسکالرشپ تننگ نا پڑو کرینے۔ ترجمان انسداد دہشت گردی نا بابت اوغانستا ن و امریکہ نا دوبہ غاتے مسترد کرساپارے کہ نائن الیون آن پد پاکستان جہانی کہول آ دہشت گردی نا توننگ کن پبی کمک کرینے، دہشت گردی نا برخلاف آپریشن آتیٹی ننا ہزار آ ورناک شہید مسنو و ملک ئِ ارب آ ڈالر اقتصادی نسخان نا مون تروئی تمانے وخت اس کہ شدت پسندی و دہشت گردی نا توننگ کن آپریشن ضرب عضب، ردالفساد و خیبر سرسہبی اٹ برجائُ۔ امریکہ تون اوار دنیا ننا سرسہبی تا اعتراف ئِ کرینو وخت اس کہ پاکستان دہشت گردی ئِ ماس آن کشنگ کن بھلوکچ اسے آ خڑچ کننگ ئِ ۔ بھارت اٹی اقلیت آتیا بیدادی نا بابت اسہ سوج اسے نا ورندی ئِ ترسا ترجمان پارے کہ بھارت اٹی مسلمان، مسیح و دلت تون اوار اقلیت آتیا عرصہ حیات ئِ تنک کننگانے و اوفتے میئی نا سُو کُننگ، اوفتا ہمپ و بٹ کننگ و اوفتے کاروبار کننگ آن توننگانے۔ جہانی برادری بھارت اٹی اقلیت آتون نارروا سلوک آ گڑتی نا درشانی ئِ کرینے۔ ترجمان ڈیہہ ٹی جم اٹنگا حالیت آتا بابت پارے کہ داہیت انا ناقابل تردید شاہدی ساڑی ارے کہ ننا دے ٹکی ہمسایہ ملک دہشت گردی و دہشت گرد آتا مالی کمکاری و پاکستان نا برخلاف تینا و ایلو ملک آتا گل زمین ئِ کاریم اٹ اتنگ ئِ ۔ ترجمان پارے کہ مقبوضہ کشمیر اٹی بھارت نا کنڈآن انسانی حق انا سنگین خلاف ورزی کننگ انگ ئِ گدرینگوک آ 70 سال اٹی لکھ آ کشمیری تے شہید کننگا و بھارتی بیدادی نا ساڑی آ چرجوئی تاریخ اٹی مریس انگا چرجوئی ئِ دابیدادی تا کمک اٹ تحریک آجوئی ئِ توننگ نا کوشست کننگ انگ ئِ۔ ترجمان پارے کہ وزیراعظم محمد نواز شریف پیلٹ گن اٹ بینائی زہمی مروک آ کشمیری تا پاکستان یا یورپ نا ہسپتال آتیٹی درمان ئِ کرفنگ نا پیش کش کریسس ولے بھارت دا پیشکش ئِ ہم مسترد کرے۔ اوپارے کہ ننا پیش کش داسہ ہم برقرار ئِ۔
