اسلام آباد ۔ 27 جولائی (اے پی پی ) پاکستان و مالدیپ نا ہڑ توم آکنڈآتا کمکاری و السی کہول آرابط غا تے پین سوگوجوڑ کننگ کے عزم انا درشانی ئِ کرسا مسلم امہ نا یکجہتی ئِ سوگوی و جہانی کہول آ اسلام نا حقی اقدار ئِ مون آ دننگ آ اتفاق کرینو وخت اس کہ مالدپ نا صدر عبداللہ یا مین عبدالقیوم اسلام آباد اٹی سارک سروک دیوان نا میزبانی کن پاکستان نا مخ تفی نا اعادہ ئِ کرے ۔ دا ہیت انا درشانی ئِ وزیر اعظم محمد نواز شریف نا مسہ دے ئی دورہ مالدیپ نا گڈ سرآ اسلام آباد و مالے آن اسہ وخت اٹجاری اسیجائی پڑو اٹی کننگا۔ دفتر خارجہ نا کنڈآن پنچ شنبے نا دے جاری پڑو نا رداٹ مالدیپ نا صدر عبداللہ یامین عبدالقیوم نا سلاہ غا 25آن 27 جولائی اسکا ن مالدپ نا دورہ ئِ کرے ۔ وزیر اعظم ما لدیپ نا 52 می آجوئی دے انا دود آتیٹی مہمان خاص نا حیثیت اٹ شرکت کرے و مالدیپ نا الس و حکومت ئِ اوفتا آجوئی نا خوشی نا وخت آ مبارکبادی تس ۔ علاقائی کمکاری نا رداٹ وزیر اعظم محمد نوازشریف و صدر عبداللہ یامین تین پہ تینی اہمیت نا معاملہ غاتیا علاقائی و جہانی فورم آتیا ہڑتوم آملک آتا نیا م اٹ خڑکی کمک و کمکاری ئِ نوشتہ کرے ۔ہڑتوم آ راہشونک بشمول سویلی ایشیائی تنظیم علاقائی کمکار (سارک)ا نا رداٹ سویلی ایشیاءنا ملک آتا نیام اٹ کمک ئِ پین مون آ دننگ آ اتفاق کریر۔ دا چرجوئی ٹی صدر عبداللہ یامین اسلام آباد اٹی سارک سمٹ نا میزبانی کن مالدیپ نا مخ تفی نا اعادہ ئِ کرے۔ پڑو نا رداٹ مالدیپ و پاکستان نا نیام اٹ تین پہ تینی افہام و تفہیم ، خیر سگالی و ایلمی آمبنی تاریخی و خڑکی تعلقداریک ئُ۔ دور ہ ٹی وزیراعظم محمد نواز شریف صدر عبداللہ یامین تون باضابطہ مذاکرات کرے و ہڑتوم آ کنڈآتاکمک و السی کہول آ رابطہ غاتے پین سوگو جوڑ کننگ نا وڑوڈول آتیا خیال آتادرشانی ئِ کریر۔ ہڑتوم آ راہشونک علاقائی و جہانی فورم تیا کمکاری ئِ پین ودفنگ نا وڑوڈول آتیا ہم ہیت وگپ کریر۔ دورہ ٹی کیہی ایم او یوز/معاہدہ غاتیا دستخط ہم کننگا ہرافتا مسخت سیل و سوات ، موسمیاتی بدلی ، واپار ، تعلیم و سول سروس و سفارتکار آتا کاریم ناکچ ئِ ودفنگ نا بشخ آتیٹی کمکاری ئِ مون آ دروئی ئِ۔ داکان بیدس پاکستان و مالدیپ نا نیام اٹ پک مروک آ ایم او یوز آعملدرآمد نا چاروکی کن اسہ اسیجائی ورکنگ کمیٹی اس ہم جوڑ کننگا۔ ہڑتوم آراہشونک داہیت ئِ تالان کریر کہ پاکستان و مالدیپ نا نیام اٹ تعلقداری سنگتی، تین پہ تینی شرف و اسیجائی مفادات آتے اٹ عبارت ئُ۔ وزیراعظم محمد نواز شریف نا دورہ آن ہڑتوم آ ملک آتا نیام اٹ ہڑتوم آ کنڈآتا تعلقداری تے پین سوگو جوڑ کننگ اٹی کمک رسینگانے۔ صدر عبداللہ یامین مالدیپ نا شونداری ٹی پاکستان نا پدریسہ زرکاری آ وزیراعظم محمد نواز شریف نا منت واری ئِ ادا کرے و زرکارآتا وارخواہی تیان فائدہ ہرفسا پین کڑد ادا کننگ نا سلہ تس۔ اودرملکی زرکاری آ رکھ انا یخین دہانی کرفسا زرکارآتا پت ئِ سوگوی تننگ کن تینا حکومت نا گام گیج آتے تالان کرے۔ وزیراعظم محمد نواز شریف پاکستان نا اقتصادی شونداری ئِ تالان کرسا پاکستان اٹی درملکی زرکار ی نا رکھ و زرکارآتا پت اٹی ودکی کن تینا حکومت نا پالیسی تے نمان کرے۔ ہڑتوم آ راہشونک مالدیپ پاکستان اسیجائی کاروباری کونسل و واپار نا بارواٹی اسیجائی ورکنگ گروپ نا اڈتننگ نا خیرمقدم ئِ کریر ہراڑآن واپار، کاروبار وزرکاری نا بشخ آتیٹی کمکاری ئِ پین مون آ دننگک و نجی بشخ انا نیام اٹ اشتراک کار اٹی ودکی تون اوار اوار ادارہ جاتی تعلقداریک ہم سوگو مریرہ۔ ہڑتوم آ ملک آتا نیام اٹ واپاری تعلقداری تے پین مون آ دننگ کن صدر عبداللہ یامین و وزیراعظم محمد نواز شریف ہڑتوم آ ملک آتا نیام اٹ پین براہ راست فضائی رابطہ غاتا بحالی آن مواصلاتی رابطہ غاتے ودفنگ نا اہمیت ئِ تالان کریر۔ اسیجائی پڑو نا رداٹ خڑکی روایتی و دودوربیدہ ہی تعلقداری و ہڑتوم آ ملک آتا منفرد سیل و سواتی صنعت آتا رداٹ صدر عبداللہ یامین سیل و سوات نا بشخ اٹی کمکاری ئِ ودفنگ نا اہمیت ئِ تالان کرے و مہمان نوازی نا صنعت نا بشخ اٹی مہارت اٹ تین پہ تینی استفادہ غا زور شاغا۔ مالدیپ نا حکومت نا یوتھ ڈویلپمنٹ نا اولیتی بشخ انا بابت صدر عبداللہ یامین مالدیپ اٹی یوتھ ڈویلپمنٹ پروگرام نا مون آ دننگ اٹی پاکستان نا کمکاری نا خیرمقدم ئِ کرے۔ ہڑتوم آ راہشونک چندی بشخ آتیٹی خڑکی تعلقداری تے کن یوتھ ایکسچینج پروگرام تیا اتفاق کریر۔ دفاعی کمکاری نا بشخ اٹی صدر عبداللہ یامین مالدیپ نیشنل ڈیفنس فورس آتا کارندہ غاتا تربیت اٹی پاکستان آن پدریسہ کمکاری نا ستائِ کرے۔ صدر عبداللہ یامین تعلیم و کاریم نا کچ اٹی ودکی نا بشخ اٹی مالدیپ نا شونداری کن پاکستان نا کنڈآن اداکروک آ اہم کڑد انا ہم اعتراف ئِ کرے۔ وزیراعظم محمد نواز شریف مالدیپ نا شونداری کن پاکستان نا عزم پیہم نا اعادہ کرسا مالدیپ نا الس کن پاکستان نا الس نا کنڈآن ٹیکی نا وڑاٹ 50لکھ ڈالر نا خصوصی گرانٹ نا ہم پڑو کرے۔ اوپاکستان نا تعلیمی ادارہ غاتیٹی مالدیپ نا طالب علم آتے کن میڈیسن ، انجینئرنگ ، فارمیسی و ڈینٹیسٹری نا بشخ آتیٹی 5ودکی وظیفہ غاتا ہم پڑو ئِ کرے۔ شونداری کن ماحولیاتی بدلی ئِ اسہ بھلو خطرہ اس سمجھسا ہڑتوم آ راہشونک موسمیاتی بدلی نا منفی زئم آتون مون تننگ کن اواری اٹ کاریم کننگ آ اتفاق کریر۔ وزیراعظم محمد نواز شریف دا بشخ اٹی خاص کر چنکا جزیرہ غاتا ریاست آتا سیوت(اے او ایس آئی ایس) نا صدر نا حیثیت اٹ مالدیپ نا پدریسہ کڑد آ مبارکبادی تس۔ انسداد دہشت گردی و انتہاءپسندی نا بشخ اٹی ہڑتوم آ راہشونک ہروڑنا دہشت گردی نا برخلاف تینا دوٹوک موقف نا اعادہ ئِ کریر۔ صدر عبداللہ یامین دہشت گردی و انتہاءپسندی نا انسداد کن پاکستان نا کوشست آتا ستائِ کرسا دامیدان اٹی تین پہ تینی کمکاری نا اہمیت ئِ تالان کرے۔ وزیراعظم محمد نواز شریف مالدیپ نا صدر ئِ پاک چین اقتصادی راہداری نا بارواٹی معلومدار کرے ہرانا مسخت اقتصادی ہم آہنگی و معاشی شونداری نا مون آ دننگ نا ئِ۔
