اسلام آباد۔ 27جولائی (اے پی پی) بنجائی وزیر انسانی حق سینیٹر کامران مائیکل پارینے کہ رنگ و نسل و مذہب آن ایڑتر مرسا انسانی حق انا پاسداری ئِ کننگ پاکستان نا وطیرہ مسنے، ہنداسوب ئِ کہ پاکستان اٹی ہر بندغ ئِ انفرادی و مذہبی آجوئی دوئی ئِ، غٹ مذہب آتا خلقت بے خوف و خلیس تینا مذہبی رسم آتے ادا کننگ کیرہ۔ پنچ شنبے نا دے اے پی پی تون ہیت وگپ کرسا پارے کہ ساڑی حکومت ملک اٹی انسانی حق انا رکھ ئِ المی جوڑ کننگ کن مثبت کوشست کننگ ئِ، داچرجوئی نا اسہ کڑی اس فروری 2016ءٹی انسانی حق انا بابت تاریخی نیشنل ایکشن پلان ئِ ہرادے سول سوسائٹی تون اوار غٹ زند انا بشخ آتا خلقت آتا مخ تفی دوئی ئِ۔ اوپارے کہ انسانی حق انا بابت نیشنل کمیشن نا اڈتننگ ئِ عمل اٹ اتنگا ہرادے مئی 2015ءٹی فعال کننگا ہرانا مسخت پسماندہ و اختہ مروک آ خلقت نا حق انا رکھ ئِ المی جوڑ کننگ کن عملی گام گیج چست کننگ وداہیت ئِ المی جوڑ کننگ نا ئِ دُن کہ غٹ بندغ آک ہراچندی انسانی حق آتا خلاف ورزی نا گواچی مسنو اوفتے دمدستی انصاف مہیا کننگے۔ بنجائی وزیر پارے کہ پاکستان اٹی ٹرانس جینڈر نا حق انا بابت خصوصی گام گیج چست کننگانے ہراٹی پاکستان نا تاریخ اٹی اولیکو وار اوفتے شناختی کارڈ جاری کننگا تانکہ او تینے راج انا اسہ کاریمی ئُ باسک اس تکر۔ اوپارے کہ ساڑی حکومت زالبول تا حق انا رکھ و اوفتے معاشی و سیاسی وڑاٹ وت واجہ جوڑ کننگ نا خصوصی گام گیج چست کننگ ئِ ہرانا عملی ثبوت سیاسی و راجی کہول آ زالبول نا پبی نمائندگی آن ملک۔ اوپارے کہ اُرائی بیدادی ، اینٹی ریپ کانود و غیرت نا پن آ خون کون آ گھناﺅنی واقعہ غاتے شیف خلنگ کن کانود و زالبول آتے کن خصوصی نیشنل کونسل نا قیام ئِ عمل اٹی اتنگا و داکونسل نا رداٹ اُرائی بیدادی نا گواچی زالبول ئِ اولیتی بنداو تیا ہروڑنا کانودی و نفسیاتی کمک فراوان کننگ انگ ئِ وخت اس کہ کم عمری نا برام نا واقعہ غاتا سدباب کن خاہوتی لاز ئِ سوگو جوڑ کننگانے۔
