کوئٹہ۔ 26جولائی (اے پی پی) وزیراعلیٰ بلوچستان نواب ثناءاللہ زہری پارینے کہ ورنانسل ئِ گوازی و ایلو جوڑ جاڑی سرجزآتیٹی بشخ ہلنگ نا وارخواہی فراوان کرسا منشیات تون اوار ایلو راجی برائی تیان رکھینگ مریک، ورناک ننا سرمایہ غاک ئُ اوفتا سہی سمت اٹی راہشونی ئِ کرسا اوفتا لائخی تے ملک و قوم نا جوڑ جاڑ وشونداری کن کاریم اٹ اتنگ نا دورس نتیجہ دوئی مریک۔ داخیال آتا درشانی ئِ او کوئٹہ ٹی قومی گوازی تا اڈتننگ نا تیاری تا جاچ ئِ ہلنگ کن اڈ ہلوک آ دیوان اٹی کرے۔ صوبائی وزیر گوازی میر مجیب الرحمان محمد حسنی و سیکرٹری گوازی محبوب احمد شاہوانی وزیراعلیٰ ئِ گوازی تا اڈتننگ نا تیاری تتون اوار اوار صوبہ ٹی گوازی تا مون آ دننگ و آسراتی تیٹی ودکی نا بابت بریفنگ تسر۔ اوپاریر کہ اکتوبر 2017ءٹی کوئٹہ ٹی قومی گوازی تا اڈتننگ نا بابت چندی آسراتی تا فراوانی و گوازی تا پٹ آتا جوڑ جاڑ و زیبائی کن 800 سد ملین روپئی جتا کننگانے۔ ہرافتے ٹی ایوب اسٹیڈیم اٹی جہانی معیار نا سوئمنگ پول، سکواش کورٹ، ٹائرن ٹریک نا جوڑ جاڑ و خلنگ آن بیدس ایلو ڈٹ آک ہم اوار ئُ۔ وزیراعلیٰ داوخت آ پارت کرے کہ ایوب اسٹیڈیم ئِ پوسکن آ سپورٹس سٹی اسے ٹی بدل کرسا ہموڑے ان ڈور و آﺅٹ ڈور گوازی تا غٹ آسراتی تا فراوانی ئِ المی جوڑ کننگے، ایوب اسٹیڈیم آن تجاوزات آتے چٹفنگے و ورناگوازی گر آتا ایوب اسٹیڈیم اسکان رسینگ ئِ آسان جوڑ کرسا گوازی تا آسراتی تیان فائدہ ہرفنگ کن موقع فراوان کننگے۔ وزیراعلیٰ قومی گوازی تا اڈتننگ نا ڈٹ آتے جہانی معیار نا رداٹ جوڑ کننگ کن نجی بشخ انا شراکت نا دوئی و دابشخ انا چاہندار آتیا تالان کنسلٹنٹ مقرر کننگ نا پارت ہم کرے۔
