اسلام آباد۔ 26 جولائی (اے پی پی) وزیر مملکت قومی جان جوڑی سائرہ افضل تارڑ پارینے کہ ساڑی حکومت جان جوڑی نا بشخ ئِ سوگو جوڑ کننگ کن ایجنڈا غا روان ئِ دارداٹ قومی و جہانی شریدار آتون اواری اٹ سوگو کوشست کننگ انگ ئِ۔ وزارت قومی جان جوڑی پاکستان فیلڈ ایپی ڈیمیا لوجی اینڈ لیبارٹری ٹریننگ پروگرام پاکستان نا بندات و غٹ گام گیج آتے کن پبی کمک نا باوری ترفک۔ داخیال آتا درشانی ئِ او تدوک آ دے مرض آتا چاروکی و وباءنا تالان مننگ نا دروشم اٹی دمدستی ورندی گام گیج آتا بارواٹی 11می سالانہ کورس انا بشخ ہلوک آتیٹی سند بشخ وپانٹ کننگ نا دود آن تران کرسا کرے۔ سائرہ افضل تارڑ پارے کہ مچ آپاکستان اٹی خراب انگا مرض آتا توننگ و چاروکی کن غٹ صوبہ غاتا جان جوڑی نا ڈاکٹر آتے تربیت نا فراوانی بنجائی حکومت نا مشن ئِ و ہند امشن نا رداٹ پاکستان فیلڈ ایپی ڈیمیالوجی و لیبارٹری ٹریننگ پروگرام کون آ گام آتے چست کننگانے۔ اوپارے کہ دراصل ساڑی آ سال تیٹی ننے پاکستان اٹی 2016ءٹی چکن گونیا و 2017 ءٹی سورک نا مرض اتون مون تروئی تما و بھلو کچ اسے آ نسخان ہم مس۔ نن داسکان پولیو نا برخلاف برسرپیکار اُن وخت اس کہ مچ آ دنیا خواہک کہ نن پولیو نا چٹفنگ کن پین کاریم کین۔ اوپارے کہ پاکستان ایپی ڈیمیالوجی اینڈ لیبارٹری ٹریننگ پروگرام پاکستان (ایف ای ایل ٹی پی) 1500 آن زیات گونڈ وختی تربیت تسنے و دا ہیت کنکن است جمی نا سوب ئِ کہ 11می سالانہ کورس پورو کروک آ وبائی مرض آتا توننگ نا چاہندار آک داکیڈراٹی اوار مریرہ۔ وزیر مملکت کورس پورو کروک آ غٹ ساڑی مروک آتے مبارکبادی تس ۔ اوامریکہ نا اٹلانٹ سینٹرز ڈیزیز کنٹرول نا ہم منت وار ی ئِ ادا کرے و جان جوڑی کن پبی کاریم کننگ نا حکومتی کوشست آتا اعادہ ئِ ہم کرے۔
