اسلام آباد۔ 26جولائی (اے پی پی) پاکستان و برطانیہ پارلیمنٹ و السی کہول آ پیپلز ٹو پیپلز رابطہ غاتے پین مون آ دننگ آ اتفاق کرسا پارینو کہ ہڑتوم آ ملک آتا پارلیمنٹس آتیٹی اڈ ہلوک فرینڈ شپ گروپ داچرجوئی ٹی اہم کڑد ادا کننگ کیک وخت اس کہ پاکستان اٹی برطانوی ہائی کمشنر تھامس ڈریو پاکستان اٹی آزادانہ ، منصفانہ و شفاف گچین کاری تے کن پارلیمنٹ نا گچین کاری اصلاحاتی کمیٹی نا ستائِ کرسا پارینے کہ برطانوی حکومت پارلیمنٹ نا باسک و پارلیمانی عملہ نا کاریم نا کچ اٹی ودکی کن ہروڑکمک کیک۔ چارشنبے ناد ے پاکستان اٹی برطانوی ہائی کمشنر تھامس ڈریو اسپیکر قومی اسمبلی سردارایاز صادق تون پارلیمنٹ ہاﺅس اٹی اوڑدہی کرے۔ داوخت آ اسپیکر قومی اسمبلی سردار ایاز صادق پارے کہ پاکستان برطانیہ تون تینا خڑکی تعلقداری تے بھاز اہمیت ایتک و اوفتے اقتصادی و پارلیمانی تعلقداری تے مون آ پین سوگو جوڑ کننگ نا خواہش تخک۔ اسپیکر پارے کہ پاکستان برطانیہ تون تینا اسٹریٹجک شریداری ئِ بھاز اہمیت ایتک و ہڑتوم آ سنگت ملک آک اہم علاقائی و جہانی معاملہ غاتیا اسہ وڑموقف تخرہ۔ اوہڑتوم آ کنڈآتا تعلقداری تے ودفنگ کن ہڑتوم آ ملک آتا سیاسی سروک، پارلیمنٹ نا باسک و السی کہول آرابطہ غاتیٹی ودکی نا گرج آ زور شاغار۔ سردارایاز صادق ہم آہنگی و ہڑتوم آ کنڈآتا کمکاری ئِ مون آ دننگ کن پارلیمنٹ نا باسک ، ڈل آتا ہن و بر و ہڑتوم آ ملک آتا پارلیمان آتیٹی فرینڈ شپ گروپ آتے پین فعال جوڑ کننگ نا گرج آ زور شاغا۔ اوبرطانیہ نا پارلیمنٹ و سی پی اے نا کنڈآن پارلیمنٹری اسسٹنٹ پروگرام نا ہم ستائِ کرے۔ اسپیکر پارے کہ ڈیہہ نا شونداری نا سیبو ڈیہہ ٹی امن و ایمنی نا حالیت آتون گنڈوک ئِ و پاکستان ڈیہہ ٹی امن و سوگوی کن پرعزم ئِ اوپارے کہ پاکستان غٹ ہمسایہ ملک آتون خوشگوار تعلقداری خواہک و پارلیمانی ڈل آتا ہن و بر و مذاکرات نا خواہش تخک۔ برطانیہ نا ہائی کمشنر تھامس ڈریو اسپیکر نا تاثر آتا ستائِ کرسا پارے کہ برطانیہ پاکستان ئِ تینا خڑکی دوست و واپاری شریدار تکک۔ اوپارے کہ برطانیہ تینا امدادی ڈٹ آتا دنگ ئِ ودفک و پاکستان تون غٹ بشخ آتیٹی کمکاری ئِ مون آ دیک۔ ہائی کمشنر اسپیکر ئِ پارلیمنٹ نا باسک و پارلیمانی عملہ نا کاریم نا کچ اٹی ودکی کن تینا حکومت نا کنڈآن ہروڑنا کمک نا باوری ترفے۔ اوپاکستان اٹی آزادانہ ، منصفانہ و شفاف گچین کاری تا اڈتننگ کن گچین کاری اصلاحات آتے کن پارلیمنٹ نا باسک آتا کوشست آتا ستائِ کرے۔ فرینڈ شپ گروپ آتا افادیت آ خیال آتا درشانی ئِ کرسا ہائی کمشنر پارے کہ ہڑتوم آ ملک آتا پارلیمان آتیٹی اڈ ہلوک فرینڈ شپ گروپ ہڑتوم آ کنڈآتا تعلقداری تے مون آ دننگ اٹی اہم کڑد ادا کننگ کیک۔
