لاہور دھماکہ کون آ واقعہ غاک دہشت گردی ئِ ماس آن کشنگ و خسنگ نا ننا عزم ئِ نزور کننگ کپک، سیکورٹی فورس آک سرسہب کارروائی تے اٹ دہشت گرد، کمکار و تخریبی کارروائی کروک آتا نیٹ ورک آتے پرغانے
راولپنڈی۔ 25جولائی (اے پی پی) بری فوج انا سروک جنرل قمر جاوید باجوہ پارینے کہ لاہور دھماکہ کون آ واقعہ غاک دہشت گردی ئِ ماس آن کشنگ و خسنگ نا ننا عزم ئِ نزور کننگ کپک، سیکورٹی فورس آک سرسہب کارروائی تے اٹ دہشت گرد، اوفتا کمکار و تخریبی کارروائی کروک آتا نیٹ ورک آتے پرغانو، علاقائی ایکڑز و پاکستان مخالف اودیم ایجنسیک دہشت گردی ئِ پالیسی نا وڑاٹ کاریم اٹ اتنگ ئُ ، پاک فوج پولیس و کانود نافذ کروک آ ادارہ غاتون سلوک ئِ۔ او سے شنبے نا دے کورہیڈکوارٹر زلاہور اٹی سیکورٹی نا بابت بڑزکو کہولی دیوان نا کماشی ئِ کریکہ۔ پاک فوج انا شعبہ تعلقات عامہ(آئی ایس پی آر) نا رداٹ آرمی چیف ئِ جاری آپریشن ردالفساد نا تازہ انگا حالیت و تدوک آ دے لاہور اٹی مروک آ دھماکہ نا بابت سرجم بریفنگ تننگا۔ جنرل قمر جاوید باجوہ لاہو ر دھماکہ ٹی نہادی جان تا زیان آ زہمی خاہوت آتون است ہسونی نا درشانی ئِ کرے۔ اوپارے کہ نن بطور قوم دہشت گردی نا برخلاف جنگ کرینن، تانکہ ننا سرسہبی ئِ المی جوڑ کننگ تون شکبر سرجزآتا قلع قمع ئِ کننگ مرے۔ اوپارے کہ علاقائی ایکڑز و پاکستان مخالف اودیم ایجنسیک دہشت گردی ئِ پالیسی نا وڑاٹ کاریم اٹ اتنگ ئُ۔ اوپارے کہ لاہور و کابل اٹی ساڑی آ دھماکہ غاتیان ننا داموقف نا توثیق مریک کہ پاکستان و اوغانستان ہڑتوم آ ملک آک دہشت گردی نا گواچی ئُ وہموخت اسکان ہڑتوم آ ملک مشکل آتا گواچی مریرہ ہراوخت اسکان علاقائی ایکڑز اوغان گل زمین ئِ کاریم اٹ اتسا کیرہ۔ اوداعزم انا اعادہ ئِ کرے کہ پاکستان اوغان سیمی علاقہ غاتیٹی دہشت گرد آتا محفوظ ٹھکانہ غاتے چٹفنگ کن اوغانستان تون کمکاری کن تیار ئِ۔ داکان مست آرمی چیف جنرل ہسپتا ل اٹی لاہور دھماکہ ٹی ٹھپی مروک آتا جان پڑسی ئِ کرے۔ کورکمانڈر لاہور لیفٹیننٹ جنرل صادق علی و انسپکٹر جنرل پولیس پنجاب ہم اوڑتون اوار ئسر۔
