وزیراعظم محمد نواز شریف بلوچستان نا شونداری ٹی خصوصی است خواہی ہلنگ ئِ، اونا سروکی ٹی پاکستان کیہی جہانی فورم تا باسک جوڑ مسنے
اسلام آباد۔ 25جولائی (اے پی پی) بنجائی وزیر ریاستیں و سیمی امور لیفٹیننٹ جنرل (ر) عبدالقادر بلوچ پارینے کہ وزیراعظم محمد نواز شریف بلوچستان نا شونداری ٹی خصوصی است خواہی ہلنگ ئِ۔ ریڈیو پاکستان نا پروگرام اٹی خیال آتا درشانی ئِ کرسا اوپارے کہ پاکستان مسلم لیگ ن 2013ءنا گچین کاری تا مہم اٹی الس تون ہراوعدہ غاتے کریسس اوفتیا پورو عملدرآمد کننگا، ساڑی حکومت بلوچستان نا شونداری ئِ اولین اولیت تسنے و وزیراعظم محمد نواز شریف صوبہ نا شونداری ٹی خصوصی است خواہی ہلنگ ئِ۔ اوپارے کہ ساڑی حکومت الس نا حالیت زار ئِ گچین جوڑ کننگ کن توانائی ، بنداوی ڈھانچہ و ٹیلی مواصلات تون اوار چندی بشخ آتیٹی بھلو بھلو ڈٹ آتا بنائِ کرے ہرافتیان گڑاس پورو و گڑاسے آ ترندی اٹ پیش رفت جاری ئِ ، داڈٹ آتا پوروی آن ملک اٹی شونداری و شونہالی نا پوسکن آ دور انا بناءمریک۔ اسہ سوج اسے نا ورندی ٹی بنجائی وزیر پارے کہ جہانی مالیاتی ادارہ غاک پاکستان نا اقتصادی پالیسی، اصلاحات و پیش رفت آ کیہی وار تینا است جمی نا درشانی ئِ کرینو۔ اوپارے کہ خارجہ تعلقداری نا بشخ اٹی ہم خاصی پیش رفت مسنے و وزیراعظم محمد نواز شریف نا سروکی ٹی پاکستان کیہی جہانی فورم تا باسک جوڑ مسنے۔
