وزیراعظم محمد نواز شریف نا سروکی ٹی حکومت پاکستان ئِ ایشین ٹائیگر اس جوڑ کننگ نا کسر آ روان ئِ، شونداری ڈٹ آتیا ترندی اٹ پیش رفت مننگ ئِ، کراچی نا روشنائیک پدی بسنو
حکومتی گام گیج آتیٹی لوڈشیڈنگ اٹی نمان کمتی، دہشت گردی نا چٹفنگ اٹی نمان پیش رفت مس
اسلام آباد۔ 25جولائی (اے پی پی) پاکستان مسلم لیگ ن نا راہشون و باسک قومی اسمبلی طاہرہ اورنگزیب پارینے کہ وزیراعظم محمد نواز شریف نا سروکی ٹی مسلم لیگ ن نا حکومت پاکستان ئِ ایشین ٹائیگر اس جوڑ کننگ نا کسر آ روان ئِ۔ سے شنبے نا دے تینا اسہ انٹرویو اسے ٹی اوپارے کہ وزیراعظم محمد نواز شریف چندی شونداری ڈٹ آتا پوروی ٹی سرگرم ئِ ، ساڑی حکومت توانائی نا تنکی و دہشت گردی تون اوار غٹ چیلنج آتون مون تننگ کن خصوصی چکار تخا، ملک انا چندی بشخ آتیٹی شونداری ڈٹ آتیا ترندی اٹ پیش رفت مننگ ئِ و بروک آ لس گچین کاری تیٹی مسلم لیگ (ن) اسہ وار ولدا السی مخ تفی اٹ سرسہبی دوئی کیک۔ اوپارے کہ داوخت سی پیک نا رداٹ ملک اٹی روڈ و شاہراہ تا چندی ڈٹ آتیا کاریم برجائِ ہرافتا پوروی آن ملک اٹی شونداری و شونہالی نا پوسکن آ دور بناءکیک۔ اسہ سوج اسے آ اوپارے کہ حکومتی گام گیج آتیٹی لوڈشیڈنگ اٹی نمان کمتی بسنے و سسٹم اٹی ودکی بجلی اوار کننگانے، ساڑی حکومت نا دور اٹی بناءکروک آ چندی ڈٹ آک پورو کننگانو و پین زوت ایسری اسکان سرمریرہ۔ داڈٹ آتا پوروی آن ملک اٹی لوڈشیڈنگ نا پورو خاتمہ المی مریک۔ اوپارے کہ ساڑی حکومت دہشت گردی نا چٹفنگ اٹی ہم نمان پیش رفت کرینے۔ خیبر پختونخوا، فاٹا، کراچی و ملک انا ایلو بشخ آتیٹی امن و ایمنی نا حالیت آتیٹی نمان گچینی بسنے، کراچی نا روشنائیک پدی بسنو۔ اوپارے کہ لس گچین کاری تیٹی مخالف آتے شکست فاش مریک و مسلم لیگ ن آ الس اسہ وار ولدا تینا پت انا درشانی ئِ کیک۔
