صدر عبداللہ یامین عبدالقیوم نا سلہ غا دورہ ٹی وزیراعظم مالدیپ نا 52می یوم آجوئی نا دود آتیٹی مہمان خاص نا حیثیت اٹ شرکت کیک
مفاہمت نا یات داشت و معاہدہ غاتیا دستخط ہم کننگک
اسلام آباد۔ 25جولائی (اے پی پی) وزیراعظم محمد نواز شریف سے شنبے نا دے مالدیپ نا مسہ دے ئی سرکاری دورہ غا رادہ مس، او(اینو) 26جولائی آ مالدیپ نا 52می یوم آجوئی نا دود آتیٹی مہمان خاص نا حیثیت اٹ شرکت کن صدر عبداللہ یامین عبدالقیوم نا سلہ غا 25آن27جولائی اسکان جمہوریہ مالدیپ نا سرکاری دورہ ئِ کننگ ئِ، بیگم کلثوم نواز، وزیراعظم نا سلاہکار خارجہ امور سرتاج عزیز ، سینیٹر پرویز رشید و بڑزکو کمامدارآک ہم اوڑتون اوار ئُ۔ دورہ ٹی وزیراعظم محمد نواز شریف مالدیپ نا صدر تون باضابطہ مذاکرات ہم کیک وخت اس کہ داوخت آ چندی بشخ آتیٹی کمکاری کن کیہی مفاہمت نا یات داشت و معاہدہ غاتیا دستخط ہم کننگک۔ داڑے داہیت قابل ذکر ئِ کہ پاکستان مالدیپ تون تینا تعلقداری تے بھاز اہمیت ایتک ہرا تین پہ تینی شرف و اسیجائی مفاد آتیا مبنی ئُ۔ مالدیپ تون سفارتی تعلقداریک26جولائی 1966ءآ استوار مسوسر ہرا وخت انا تدینگ انگ تون اوار اوار سوگو مننگ ئُ۔ ہڑتوم آ ملک آک تین پہ تینی اہمیت نا معاملہ غاتیا علاقائی و جہانی فورم تیا اسہ ایلو تون خڑکی کمک کیرہ۔ پاک مالدیپ تعلقداریک ہڑتوم آ ملک آتا الس نا نیام اٹ خڑکی و پرجوش تعلقداری تیان عبارت ئُ۔ وزیراعظم نا دورہ آن سیاسی ، واپاری، اقتصادی، دفاعی، سیل و سواتی ، تعلیمی و السی کہول آ رابطہ غاتون اوار غٹ بشخ آتیٹی ہڑتوم آ کنڈآتا تعلقداری تے پین سوگوی رسینگک۔ دادورہ ڈیہہ نا ملک آتون فعال تعلقداری تا تینا پالیسی تیان اہم آہنگ ئِ۔
