جنرل قمر جاوید باجوہ نا اوغانستان و امریکہ ٹی گڑاس حلقہ غاتا کنڈآن دوبہ خلنگ آ گڑتی نا درشان
اشتعال انگیزی نا باوجود پاکستان تینا مثبت کڑد ئِ برجاتخک، جنرل قمر جاوید باجوہ
راولپنڈی۔ 24جولائی (اے پی پی) بری فوج انا سروک جنرل قمر جاوید باجوہ تون ریزولوٹ سپورٹ مشن و اوغانستان اٹی امریکن فورس آتا کمانڈر جنرل جوئن ڈبلیو نیکلسن اوڑدہی کرے، جنرل قمر جاوید باجوہ دہشت گردی نا برخلاف جنگ اٹی پاکستان نا کڑد ئِ نزور کننگ کن اوغانستان و امریکہ ٹی گڑاس حلقہ غاتا کنڈآن کروک آ دوبہ خلنگ آ گڑتی نا درشانی ئِ کرے۔ پاک فوج انا شعبہ تعلقات عامہ(آئی ایس پی آر) نا رداٹ جی ایچ کیو راولپنڈی ٹی مروک آ اوڑدہی ٹی ڈیہہ نا سلامتی نا حالیت وسیمی انتظام نا معاملہ غاتیا سجفنگا۔ آرمی چیف جنرل قمر جاوید باجوہ دہشت گردی نا برخلاف جنگ اٹی پاکستان نا کڑد ئِ نزور کننگ کن اوغانستان و امریکہ ٹی گڑاس حلقہ غاتا کنڈآن کروک آ دوبہ خلنگ آ گڑتی نا درشانی ئِ کرے۔ اوپارے کہ دامحض اتفاق اس اف کہ دا سرحال ئِ ہندن ئُ وخت اسے ٹی ہرفنگ انگ ئِ ہراتم امریکہ ٹی پالیسی آ نظرثانی کننگ انگ ئِ۔ اوپارے کہ اشتعال انگیزی نا باوجود پاکستان تینا مثبت کڑد ئِ جاری تخک انتئے کہ نن سمجھنہ کہ دہشت گردی ئِ شکست تننگ قومی مفاد اٹی ئِ۔ ریزولوٹ سپورٹ مشن و اوغانستان اٹی امریکن فورس آتا کمانڈر جنرل جوئن ڈبلیو نیکلسن پاک فوج انا کسبی مہارت و الس نا عزم انا ستائِ کرے۔ ہڑتوم آ شخصیت آک اتفاق کریر کہ ڈیہہ ٹی امن و سوگوی کن کمک و رابطہ غاتے برجاتخنگک۔ داوخت آ امریکی سفیر ڈیوڈ ہیل ہم ساڑی ئس۔
