یورپ نا دورہ ٹی اہم راہشون و ادارہ غاتون کشمیر نا ویل انا بارواٹی گچین خیال آتا درشانی مس
اسلام آباد۔ 24جولائی (اے پی پی) صدر آزاد کشمیر سردار محمد مسعود خان تون باسک آزاد جموں و کشمیر کونسل سردار عبدالخالق وصی و پنی سیاسی و راجی شخصیت سردار الطاف خان آف تھوراڑ اوڑدہی کریر و علاقائی ویل، روڈ آتا حالیت، آبنوشی نا اسکیم و تین پہ تینی است خواہی نا ایلو معاملہ غاتیا سرجم خیال آتا درشانی ئِ کریر، ہڑتوم آ راہشونک حلقہ نمبر 4انا ویل آتے صدر آزاد کشمیر ئِ پیش کریر۔ صدر سردار مسعود خان پارے کہ بحیثیت جم اٹنگا آزاد کشمیر نا غٹ حلقہ غاتا الس ئِ ویل آک مون تروک ئُ۔ حکومت آزاد کشمیر داویل آتا آخبتی ایسری و جامع جوڑ جاڑ و شونداری کن ٹھوس ڈٹ بندی کرینے، شاہراہ تا جہانی معیار نا رداٹ جوڑ جاڑ، لینڈ سلائیڈنگ آن بچنگ و پِر تیان روڈ آتا بھس کاری ئِ توننگ کن گام گیج المی ئِ۔ صدر آزاد کشمیر پارے کہ مستین نا آزموندہ غاتے مون آ تخسا ہر روڈ اسہ وار جوڑ جاڑ مریک تو پِرتا اسہ سیزن اس گدرینگ انگ آن پد کپی تا منظر ئِ پیش کیک۔ ہنداوڑ کروڑ آ روپئی نا خڑچ بیرہ منہ تُو اٹی زیان مریک۔ داحالیت آتا تدارک کن ڈٹ بندی و کاریم نا معیار ئِ پین گچین جوڑ کروئی مریک۔ اوپارے کہ دا چرجوئی ٹی ایلو ملک آک ہراڑے پِر زیات مریک و نسبتاََ مشی آ علاقہ غاتیا تالان ئِ۔ اوفتا آزموندہ غاتیان فائدہ ہرفنگے۔ صدر آزاد کشمیر پارے کہ تھوراڑ و ایب و کیب انا علاقہ غاتیٹی کنوئی آ دیر انا کاختی و جان جوڑی نا آسراتی تا کمتی ئِ۔ داچرجوئی ٹی وزیراعظم آزاد کشمیر نا خصوصی کمک المی ئِ۔ ہڑتوم آ راہشونک تینا یورپ نا دورہ ٹی کشمیر نا ویل ئِ تالان کننگ آ صدر آزاد کشمیر ئِ مبارکبادی تسر ۔ و اومیت ظاہر کریر کہ نما مخلصانہ کوشست آک زوت رنگ اس اتیرہ۔ و کشمیر نا ویل اقوام متحدہ نا قرارداد آتا روشنی ٹی ایسر مریک۔ صدر آزاد کشمیر پارے کہ دورہ یورپ اٹی اہم راہشون و ادارہ غاتون کشمیر نا ویل انا بابت مثبت خیال آتا درشانی مسنے۔ اومیت ئِ کہ دا اوڑدہی و کوشست آتا نتیجہ غاک مون آ بریرہ۔ سردار مسعود خان پارے کہ بھارت سفارتی کوشست آتیٹی بگسا کنٹرول لین آ سیزفائر نا خلاف ورزی ئِ کننگ ئِ۔
