اسلام آباد۔ 24جولائی (اے پی پی) قومی احتساب بیورو نا چیئرمین قمر زمان چوہدری پارینے کہ نیب بدعنوانی نا چٹفنگ کن پرعزم ئِ ، بدعنوانی نا چٹفنگ کن پاکستان ئِ سارک ملک آتیٹی رول ماڈل اس سرپند کننگ بھلو اعزاز انا ہیت اسے۔ ٹرانسپرنسی انٹرنیشنل رپورٹ نار داٹ پاکستان نا کرپشن ریسپشن انڈیکس گدرینگوک آ مسہ سال اٹی 175آن کم مرسا 116غا بسنے۔ نیب انا کوشست آتا سوب پاکستان سارک اینٹی کرپشن فورم نا اولیکو چیئرمین جوڑ مسنے ہرا اسہ بھلو سرسہبی اسے۔ او دوشنبے نادے نیب ہیڈکوارٹر اٹی ادارہ نا کارکڑد نا بابت جاچ دیوان نا کماشی ئِ کریکہ۔ اوپارے کہ نیب ئِ دانا بناءکننگ آن پد آن بندغ و نجی و سرکاری ادارہ غاتا کنڈآن 3لکھ 43ہزار 356غاو رسینگانے۔ داوخت اٹی 11ہزار 581غاو تے پک کننگا۔ 7ہزار 587انکوائری، 3ہزار 846انویسٹی گیشن و تعلقدار احتساب عدالت آتیٹی 2ہزار 808 کرپشن ریفرنس دائر کننگا وخت اس کہ سزاتننگ نا جم اٹنگا کچ 76درسد سلیس۔ نیب انا بھلا سرسہبی آن اسہ 287.763ارب روپئی نا ریکوری کرسا قومی خزانہ ٹی جمع کرفوئی ئِ۔ دیوان اٹی پاننگاکہ نیب ساڑی آ انتظامیہ نا مد اٹی 45ارب روپئی ریکور کرے ہرابھاز بھلو سرسہبی اسے۔ ہنداوڑ 2014ءآن 2017ءٹی غاو، انکوائری و انویسٹی گیشن آتا کچ ہنداخہ ہی وخت انا مقابلہ ٹی کم وود اِرا گنازیات ئِ۔ گدرینگوک آ مسہ سال انا حساب وکتاب چیئرمین نیب نا سروکی ٹی غٹ عملہ نا سخت خواری نا عکاس ئِ۔ غاو تا کچ اٹی ودکی داہیت انا ہم عکاس ئِ کہ الس نا نیب آ پت ودانے۔ چیئرمین نیب قمر زمان چوہدری پارے کہ نیب انا عملہ نا کارکڑد ئِ پین ودفنگ نا چرجوئی ٹی اسہ جامع نظام اس وضع کننگانے ہرانا رداٹ نیب اناعلاقائی بیوروتے گدرینگوک آ مسہ سال اٹی سالانہ بنداو تیا جانچنگ انگ ئِ۔ باقاعدہ مانیٹرنگ و انسپیکشن اٹی نیب انا علاقائی بیورو تا کارکڑد پدریسہ ودسا ہِننگ ئِ۔ اوپار ے کہ نیب اسلام آباد اٹی سارک سیمینار اس اڈ تس ہراٹی باسک ملک آک نیب انا انسداد بدعنوانی نا حکمت عملی و بدعنوانی نا برخلاف گام گیج آتا سوب پاکستان ئِ سارک ملک آتے کن رول ماڈل اس گوندنگانے۔ پاکستان نا انسداد بدعنوانی نا بابت کوشست و سرسہبی تیٹی اودے سارک ملک آتا انسداد بدعنوانی فورم نا اولیکو چیئرمین گچین کننگانے ہر ا پاکستان کن اسہ بھلو سرسہبی اسے۔
