اسلام آباد۔ 24جولائی (اے پی پی) وزیراعظم محمد نواز شریف مالدیپ نا صدر عبداللہ یامین عبدالقیوم نا سلہ غا 25آن 27جولائی اسکان جمہوریہ مالدیپ نا سرکاری دورہ ئِ کیک۔ او مالدیپ نا 52می یوم آجوئی نا دود آتیٹی مہمان خاص مریک ہرا 26جولائی آ اڈ ہلیک۔ دوشنبے نا دے دفترخارجہ نا کنڈآن جاری بیان نا رداٹ وزیراعظم محمد نواز شریف مالدیپ نا صدر تون باضابطہ مذاکرات ہم کیک وخت اس کہ دا وخت آ چندی بشخ آتیٹی کمکاری کن کیہی مفاہمت نا یات داشت و معاہدہ غاتیا دستخط ہم کننگک۔ داڑے داہیت قابل ذکر ئِ کہ پاکستان مالدیپ تون اپنے تعلقداری تے بھاز اہمیت ایتک ہرا تین و تینی شرف و اسیجائی مفادات آتیا مبنی ئُ۔ مالدیپ تون سفارتی تعلقداریک26 جولائی 1966ءآ استوار مسوسر ہرا وخت تدینگ تون اوار اوار سوگو مننگ ئُ۔ ہڑتوم آ ملک آک تین پہ تینی اہمیت نا معاملہ غاتیا علاقائی و جہانی فورم آتیا اسہ ایلو تون خڑکی کمک کیرہ۔ پاک مالدیپ تعلقداری ہڑتوم آ ملک آتا الس نا نیام اٹ خڑکی و پرجوش تعلقداری تیان عبارت ئِ۔ وزیراعظم نا دورہ آن سیاسی، واپاری ، اقتصادی ، دفاعی ، سیل و سواتی ، تعلیمی و السی کہول آ رابطہ غاتون اوار غٹ بشخ آتیٹی ہڑتوم آ کنڈآتا تعلقداری تے پین سوگوی رسینگک۔ دادورہ ڈیہہ نا ملک آتون فعال تعلقداری نا ننا پالیسی تون اہم آہنگ ئِ۔
