راج انا گچینی و نزور تپہ غاتا حق انا رکھ اکن نزور تپہ غاتے رکھ و کانودی کمک فراوان کروک آ ادارہ غاتا گرج ئِ، صدر مملکت ممنون حسین
اسلام آباد۔ 21جولائی (اے پی پی) صدر مملکت ممنون حسین پارینے کہ راج انا گچینی و نزور تپہ غاتا حق انا رکھ اکن ہندن انگا ادارہ غاتا گرج ئِ ہرا دا تپہ غاتے رکھ و کانودی کمک فراوان کیر۔ اوپارے کہ نیشنل کمیشن انسانی حق(این سی ایچ آر) کون آ ادارہ راج انا است جم و سوگوی کن المی ئِ۔ صدر مملکت داخیال آتا درشانی ئِ نیشنل کمیشن انسانی حق انا چیئرمین جسٹس ریٹائرڈ علی نواز چوہان تون ہیت وگپ کرسا کرے ۔ داوخت آ این سی ایچ آر سندھ انا باسک اینس ہارون ہم اوڑدہی ٹی ساڑی ئس۔ صدر مملکت پارے کہ ننا عقیدہ و ملکی آئین غٹ شاری تا بنداوی حق ئِ پورو رکھ فراوان کیک۔ او است جمی نا درشانی ئِ کرے کہ حکومتی گام گیج آتا سوب پاکستان اٹی انسانی حق انا حالیت آک دنیا نا گیشتر ملک آتیان گچین ئُ ولے دانا مستی گچینی کن کوشست آک بایدے برجاسلر۔ صدر مملکت پارے کہ اُرائی بیدادی نا واقعہ غاتا سدباب و داچرجوئی ٹی کانود سازی نا گرج ئِ۔ اوداہیت آ زور شاغا کہ اُرائی بیدادی نا واقعہ غاتے کریمنل کیس انا وڑاٹ اندراج کننگے۔ صدر مملکت پارے کہ انسانی حق کمیشن الیکٹرانک و پرنٹ میڈیا نا کمک اٹ الس ئِ اوفتا حق انا بابت آگاہی مہیا کے۔ نیشنل کمیشن انسانی حق انا چیئرمین جسٹس ریٹائرڈ علی نواز چوہان صدر مملکت ئِ ادارہ ٹی کروک آ گام گیج آتا بارواٹی بریف کرے۔
