لواری ٹنل نا پوروی چترال و دیر بالا نا الس کن اسہ اہم ئُ مزل اسے نا نشان ئِ، ٹنل نا پوروی آن علاقہ ٹی شونداری و شونہالی نا پوسکن آ دور انا بناءمریک
اسلام آباد۔ 21جولائی (اے پی پی) وزیراعظم نا سلاہکار و پاکستان مسلم لیگ (ن) انا راہشون انجینئر امیر مقام پارینے کہ لواری ٹنل نا پوروی چترال و دیر بالا نا الس کن اسہ اہم ئُ مزل اسے نا نشان ئِ، داٹنل نا پوروی آن علاقہ ٹی شونداری و شونہالی نا پوسکن آ دور انا بنامریک۔ جمعہ نا دے تینا اسہ انٹرویو اسے ٹی اوپارے کہ ساڑی حکومت لواری ٹنل نا ڈٹ ئِ ایسری اسکان سرکننگ اٹی خصوصی است خواہی ہلک۔ مستین اٹی یخ انا موسم اٹی لواری ٹاپ آ برف باری نا سوب سال انا چار و پنچ تُو اسکان چترال نا ملک انا ایلو بشخ آتیان ڈغاری رابطہ مننگ کتوکہ ہرانا سوب علاقہ نا الس ئِ مشکل آتون مون تروئی تماکہ ، داچار پنچ تُو اٹی چترال نا خلقت تینا اُراتیا سرمننگ کن اوغانستان نا کسر آ خطر سفر اختیار کننگ آ بیوس مسورہ ولے ٹنل نا پوروی آن داسہ چترال نا الس مچ آ سال ملک انا ایلو علاقہ غاتون رابطہ کننگ کیرہ۔ اوپارے کہ پاک چین اقتصادی راہداری ڈٹ انا رداٹ دا علاقہ غاتے ہم متبادل روٹ انا وڑاٹ اوار کننگانے۔ اوپارے کہ وزیراعظم محمد نواز شریف لواری ٹنل نا ڈٹ ئِ پورو کننگ اٹی بھاز است خواہی نا درشانی ئِ کرے و اونا سوب علاقہ و ملک انا شونداری نا دا اہم انگا ڈٹ ایسری اسکان سرمس۔ اوپارے کہ مسلم لیگ ن نا حکومت الس نا شونداری و شونہالی ایجنڈا ئِ مون آ دیک و انشاءاللہ 2018 ءنا گچین کاری تیٹی ہم مسلم لیگ ن محمد نواز شریف نا سروکی ٹی سرسہب مریک۔
