ایس سی او ءِ سروک دیوان پاکستان ءِ واستہ گیم چینجر  ءِ ثابت بیت، خطہ ءَ تجارت ءُ ایمنی   ءِ دیمروئی ءِ واستہ جزم انت، عطا اللہ تارڑ

اسلام آباد۔13اکتوبر  (اے پی پی):بنجاھی   وزیر ءِ  اھوالکاریءُ    نشریات، راجی  مڈی ءُ    دود ءُ    ربیدگ عطا اللہ تارڑ  ءَ گشتگ کہ ایس سی او ءِ سروک دیوان پاکستان ءِ ھاتر ءَ گیم چینجر بیت  پڑ   ءَ تجارت ءُ    ایمنی  ءِ دیمروئی ءِ ھاتر ءَ جزم انت۔ ایس سی او ءِ سروک دیوان ءَ چہ دمگ ءَ وت مہ وتی تجارت ءُ امن ءِ راہ پچ بیت۔ اے ھیالانی درشانی آئی ءَ یک شمبے ءِ روچ ءَ ایس سی او سروک دیوان ءِ تیاری ءِ ھوالگ ءَ درملکی میڈیا ءَ گوں تران کنان ءَ کت۔ بنجاھی   وزیر ءِ اھوالکاری ءَ گوشت کہ پاکستان ایس سی او سروک دیوان ءِ ھاسیں مراگش ءِ میزبانی ءَ کنگ ءَ اِنت کہ مئے واستہ شرپ ءِ جیڈھ اِنت، پاکستان میاں اوستمانی تک ءَ دیم ءَ آیگ ءَ اِنت، گوستگیں روچاں ملائیشیا ءِ مزن وزیر انور ابراہیم ءَ پاکستان ءِ تر ءُ    تاب کتگ ایشی ءِ ساھت ءَ دو نیمگی سیادی، سرمایہ کاری ءُ دوئیں ملک آنی نیام ءَ کمک ءِ تہ ءَ گیشی ءِ سر ءَ گپ ءُ تران کنگ بوت۔ ملائیشیا ءِ مزن وزیر ءَ پاکستان ءَ چہ برآمدات ءِ تہ ءَ گیشی ءِ جار ھم جتگ، دھان ءُ حلال گوشت ءِ درآمد، دھور، حلال گوشت ءُ اے دگہ چیزانی برآمد کنگ ءَ چہ دوئیں ملک آنی نیام ءَ سیادی گیش مھکم بنت ۔ آئی ءَ گوشت کہ ملائیشیا ءِ مزن وزیر ءِ تر ءُ    تاب سک کامیاب بوتگ، آئی ءِ تر ءُ    تاب ءِ تامُر ءَ پد سعودی عرب ءِ سئے ڈل آں سعودی عرب ءِ سرمایہ کاری ءِ وزیر ءِ سروکی ءَ پاکستان ءِ تر ءُ    تاب کتگ۔ بنجاھی   وزیر ءَ گوشت کہ سعودی بادشاہ محمد بن سلمان ءَ پاکستان ءِ گوما تجارت ءُ    سرمایہ کاری ءَ را گیش کنگ ءِ واستہ سک باز دلگوشی ءِ درشان کتگ، ءُ    سعودی عرب ءِ گوما 2.2ارب ڈالر ءِ مفاہمت نامہ ءِ سر ءَ دستخط کتگ۔ سعودی عرب ءِ ڈل ءِ گوما بی ٹو بی سیشن کنگ بوت، تجارت ءُ    سرمایہ کاری ءَ را گیش کنگ ءِ ھاتر ءَ معاہدہ کنگ بوت۔ آئی ءَ گوشت کہ سعودی عرب ءِ گوما کشت ءُ    کشاری، معدنیات، انفارمیشن ٹیکنالوجی، لائیو اسٹاک، ءُ    توانائی ءِ پڑ ءَ کمک دیمروئی کنگ ءَ انت۔ بنجاھی   وزیر ءَ گوشت کہ پاکستان ءَ سعودی فاسٹ فوڈ چین "البک” بندات بوھگ ءَ انت، اے درگت ءَ مفاہمت نامہ ءِ سر ءَ دستخط کنگ بوت۔ بنجاھی   وزیر ءَ گوشت کہ گوستگیں وھد ءَ ایران ءِ نمیرانیں صدر ڈاکٹر ابراہیم رئیسی ءَ ھم پاکستان ءِ تر ءُ    تاب کتگ، ایران ءِ گوما سیادی ءَ را مھکم کنگ ءِ واستہ آئی ءِ تر ءُ    تاب سک باز المی انت۔ آئی ءَ گوشت کہ پاکستان ایندگہ ملک آنی گوما وتی شریکداری ءَ را سک باز ارزشت دنت، ما پیسر ءَ گوشتگ ات کہ کجام ھم ملک ءِ گوما مئے سیادی دومی ملک ءِ ھرچ ءُ    درچ ءَ بوت نہ کنت۔ آئی ءَ گوشت کہ پاکستان ءِ معیشت دیمروئی کنگ ءَ اِنت، گوستگیں پی ڈی ایم حکومت ءِ ساھت ءَ ما ملک ءَ را ڈیفالٹ ءِ ھترہ ءَ چہ رکینتگ، مئے اقتصادی اشارہ گہتر بوھگ ءَ اَنت، افراط زر ءِ شرح کہ گوستگیں سال ءَ 32درسد بوتگ، 6.9درسد ءَ چہ کم بوتگ۔ اے مالی سال ءِ اولی سہ ماہی ءَ درملکیں پاکستانی 8.8 ارب ڈالر ءِ زرّ ءِ دیم دیگ وتی ملک ءَ اتکگ، درملکیں پاکستانی معیشت ءِ گہتری ءِ تہا یک ھاسیں کردے داریت، ایشی ءِ ھاتر ءَ آ منت وار انت، پمیشکا باز پیسر گیشتریں زرّ ءِ دیم دیگ ھچبر وتی ملک ءَ نہ اتکگ۔ آئی ءَ گوشت کہ مئے برآمدات آنی تہ ءَ 14درسد گیشی بوتگ، تجارتی خسارہ ءِ تہ ءَ مدام کمی بوھگ ءَ اِنت، آئی ٹی ءِ برآمدات 3.2ارب ڈالر ءَ سر بوتگ اَنت۔ بنجاھی   وزیر ءَ گوشت کہ مئے درستیں اقتصادی اشاریہ آں مزنیں کساسے ءَ گہتری اتکگ، کس ءَ اے گمان نہ بوتگ کہ مہنگائی 6.9درسد ءَ سر بیت۔ آئی ءَ گوشت کہ پالیسی ریٹ ءِ تہ ءَ ھاسیں کمی ءَ چہ معیشت مھکم بوتگ، ما لوٹ آں مئے تجارت ءُ    سرمایہ کاری ءِ تہ ءَ گیشی بہ بیت۔ مئے دری پالیشی ءُ معیشت گہتر بوتگ، ما تجارت ءُ سرمایہ کاری ءِ ھوالگ ءَ لبرل پالیسی ءِ رندگیری ءَ کنگ ءَ آں۔ آئی ءَ گوشت کہ چین ءِ مزن وزیر لی کیانگ پاکستان ءِ تر ءُ    تاب ءَ انت، اے 11سال ءَ پد چین ءِ مزن وزیر ءِ پاکستان ءِ اولی تر ءُ    تاب بیت، چینی مزن وزیر ءِ پاکستان ءِ تر ءُ    تاب سی پیک ءِ ھوالگ ءَ گیم چینجر ثابت بیت۔ سی پیک ءِ دومی بھر ءَ جوانیں دیمروئی بوھگ ءَ انت ۔ آئی ءَ گوشت کہ چینی مزن وزیر ءِ پاکستان ءِ تر ءُ    تاب ءِ وھد ءَ دو نیمگی گپ ءُ    تران بیت، ایشی ءَ ابید سی پیک ءِ چیر دستی ءَ اقتصادی ءُ    بیپاری سیادی ءُ    کمک ءَ ھوار پاکستان ءُ    چین ءِ سیادی ءِ درستیں پڑ آنی سر ءَ سرجمیں گپ ءُ    تران بیت۔ آئی ءَ گوشت کہ چینی مزن وزیر ءِ تر ءُ    تاب ءِ ساھت ءَ ڈل آنی تک ءَ گند ءُ    نند ھم بیت ایشی ءِ تہ ءَ تجارت ءَ ھوار جتاجتائیں پڑ آنی تہ ءَ کمک ءِ بابت ءَ گپ ءُ    تران کنگ بیت۔ بنجاھی   وزیر برائے اھوالکاری عطا اللہ تارڑ  ءَ گوشت کہ ایس سی او ءِ سروک دیوان ءِ برجم دارگ پاکستان ءِ واستہ شرپ ءِ گپ اِنت، ایس سی او ءِ سروک دیوان ءِ تناظر ءَ بنجاھی   دارالحکومت اسلام آباد ءَ را جوانیں رنگ ءَ آرائش کنگ بوتگ ءُ    پاکستان ءِ دود ءُ    ربیدگ پیش کنگ ءِ کوشست کنگ بوتگ۔ آئی ءَ گوشت کہ ایس سی او ءِ سروک دیوان پاکستان ءِ واستہ گیم چینجر جوڑ بیت۔ ایس سی او دمگی جیڈھ ءُ    چیلنج آنی سر ءَ گپ ءُ    تران کنگ ءِ واستہ دمگی کمک ءِ مستریں فورم اِنت۔ ایس سی او ءِ سروک دیوان ءَ چہ دمگی چیلنج، دمگی رابطہ، دمگی جیڈھ آنی گیواری، اقتصادی ءُ    دود ءُ    ربیدگی دیمروئی ءِ سر ءَ چہ دیم ءَ رؤگ ءَ کمک رسیت۔ بنجاھی   وزیر ءَ گوشت کہ پاکستان سک باز وھد ءَ پد ایس سی او ءِ میزبانی ءَ کنگ ءَ انت، اے درگت ءَ بندوبست گڈی رنگ ءَ کنگ بوتگ انت، فول پروف سیکورٹی بندوبست کنگ بوتگ انت۔ آئی ءَ گوشت کہ ایس سی او سروک دیوان ءِ موہ ءَ ملک آنی سروک آنی وت مہ وتی گند ءُ    نند ھم کنگ بیت۔ آئی ءَ گوشت کہ پاکستان خطہ ءَ تجارت ءُ    امن ءِ دیمروئی ءِ واستہ جزمیگ انت، ایس سی او ءِ سروک دیوان خطہ ءَ وت مہ وتی تجارت ءُ    امن ءِ واستہ راہ پچ کنت۔