بنجاھی  وزیر تجارت جام کمال ءَ گوشت کہ پاکستانی کمپنی آنی کار کرد  ءَ را گیش کنگ ءَ چہ برآمدات ءَ را گیش کنگ بوت کنت، پاکستان ءُ   سعودی عرب ءِ نیام ءَ تجارت ءِ کساس گیش بوھگ ءَ اِنت

اسلام آباد۔10اکتوبر  (اے پی پی):بنجاھی  وزیر تجارت جام کمال ءَ گوشت کہ پاکستانی کمپنی آنی کارکردگی ءَ را گیش کنگ ءَ چہ برآمدات ءَ را گیش کنگ بوت کنت، پاکستان ءُ   سعودی عرب ءِ نیام ءَ تجارت ءِ کساس ءَ را گیش کنگ بوھگ ءَ انت پاکستان ءِ تہ ءَ مردمی قوت ءِ پھجارینگ ءِ سرجمیں وس ءُ   واک است انت۔ سعودی وژن 2030 ءِ سرجمی ءِ واستہ آسراتی ءِ ھاتر ءَ کمک کنگ بوتگ۔ آئی ءَ اے ھیالانی درشانی پنچ شمبے ءِ روچ ءَ یک دمگی ھوٹلے ءَ پاک سعودی بزنس فورم 2024 ءِ بنگیجی دیوان ءِ سروکی ءَ کنان ءَ کت۔ بنجاھی  وزیر تجارت ءَ سعودی عرب ءَ چہ اتکگیں کاروباری مردم، کمپنی ءُ   سعودی ایندگر اہلکار آنی منت گپت۔ آئی ءَ گوشت کہ پاکستان ءُ   سعودی عرب ءِ نیام ءَ یکجائی دود ءُ   ربیدگ ءُ   ارزشت ءِ شریک انت ءُ   دوئیں ملک آنی نیام ءَ مھکمیں تجارتی شریکداری است انت۔ جام کمال ءَ گوشت کہ پاکستان سعودی عرب ءَ مزنیں کساسے ءَ برنج، گوشت، چمڑہ، دلیہ، میوہ ءُ   اے دگہ چیز برآمد کنت۔ آئی ءَ گوشت کہ مزن وزیر شہباز شریف ءِ وژن ءِ چیر دستی ءَ وزارت تجارت دو نیمگی تجارت ءِ تہ ءَ گیشی ءِ واستہ سرجمیں گامگیج کنگ ءَ انت۔ وزیر تجارت ءَ گوشت کہ پاکستان سعودی عرب ءَ را انفارمیشن ٹیکنالوجی ءِ شوبگ ءَ ازمت پجاری کنگ لوٹ ایت، ایشی ءَ ابید سعودی عرب ءَ فارماسیوٹیکل ءُ   ٹیکسٹائل ءِ شوبگ ءَ ھم برآمد کنگ ءِ تہ ءَ گیشی کنگ بیت۔ جام کمال ءَ گوشت کہ پاکستان فروری 2025 ءَ سعودی عرب ءَ یک ملکی نمائش ءِ برجم دارگ ءَ انت، ایشی ءِ تہ ءَ سعودی سرمایہ کار ءُ   الس ءَ را انفارمیشن ٹیکنالوجی، فوڈ، معدنیات ءُ   ایندگر شوبگ آنی تہ ءَ سرمایہ کاری ءِ موہ رس ایت۔ آئی ءَ گوشت کہ پاکستان ءُ   سعودی عرب یکجائی ءَ تجارت ءِ تہ ءَ گیشی ءُ   برجمیں دیمروئی ءِ ھاترا کار کنگ ءَ اَنت۔