اسلام آباد۔ 10 اکتوبر (اے پی پی) وزیراعظم محمد شہباز شریف پارینے کہ پنچ آئی پی پیز آتون کروک آ معاہدہ اوفتا تین پہ تینی رضامندی اٹ چٹفنگانے، دا آئی پی پیز آک قومی فائدہ غاتے جندی فائدہ غاتیا مقدم تخار، داڑآن 411 ارب روپئی نا بچت مریک، زرگزران نا گچینی کن ترندی اٹ گام گیج کننگ انگ ءِ،ننا زرگزران پدریسہ سوگوی ناکنڈآ ہِننگ ءِ، زرراہی تس اٹی ریکارڈ ودکی مسنے۔ پنچ شنبے نادے آ بنجائی کابینہ نا دیوان اٹی گپ وتران کرسا وزیراعظم پارے کہ اللہ ناشکر ءِ کہ ملکی زرگزران سوگوی نا کنڈآ ہِننگ ءِ۔ تدوک آ دے اسہ پین خوشی اسے نا خبر بس کہ ننا سہ ماہی زرراہی تس 8 ارب 80کروڑ ڈالر آن گدرینگا ہرا مستین نا غٹ سہ ماہی زرراہی تس نا مقابلہ ٹی اسہ ریکارڈ اسے۔ داڑکن عظیم پاکستانی پردیسی تا منت واری ءِ ہرفنہ ہرادے و نن خواری کرسا تینا رزق حلال ناکمائی ءِ پاکستان آ گدریفرہ۔ داداہیت انا غمازی کیک کہ پاکستان نا زرگزران داسہ مون آہِننگ ءِ۔ دابابت داسہ پین سفر طے کننگ ءِ ہراٹی مستین آنبار چیلنج مون بریک ولے ہراوڑ 7 تُو اٹی چیلنج آتا اسہ ٹیم اسے نا وڑاٹ مقابلہ ءِ کرین و اللہ تعالیٰ ننا خواری و خلوص نا صلہ ءِ تس ، ہنداوڑآخبت ہم اسیجائی کوشست آتے اٹ دا چیلنج آتا مون ءِ تورنہ۔ اوپارے کہ پاکستان نا لس بندغ کبینی، کبین پالیسی شرح سود، کنوئی آ گڑاتا نہاد آتیٹی ودکی تون اوار بے پناہ مشکل آتون مون تسنو۔ پاکستان نا الس صبر وسگ اٹ دا مشکل آتے کاٹار، داسہ ہم دُن اف کہ دا مشکل آک پورو چٹانو ولے کرار کرار آ گچینی بننگ اٹی ءِ، قوم ہراقربانی تے تسنے اوڑآ نن غٹ اوفتا منت وار اُن۔ وزیراعظم پارے کہ تیرمہ ٹی 50 ارب روپئی آن 200 یونٹ ماہانہ کاریم اٹ اتوک آ اُرائی صارف آتے ریلیف تسن، پنجاب حکومت ہم اِرا تُواکن بجلی نا بل آتیٹی 50 ارب روپئی آن زیات نا ریلیف تس، داہموگام گیج آک ءُ ہرافتیان دااشارہ ملک کہ بنجائی و صوبائی حکومت آک الس ءِ مون تروک ویل آتیان نئے بیرہ پورو وڑاٹ معلومدار ءُ بلکن اوفتے ریلیف تننگ کن ہم المی گام گیج کننگ اٹی ءُ۔ وزیراعظم پارےکہ سیاسی پوائنٹ سکورنگ آن بیدس داپاوہ کہ مستین اٹ اسہ سنگدل حکمران اس بس ہراداپارے کہ کبینی تون دانا ہچ ءُ کاریم اس اف ولے ساڑی حکومت الس نا نمائندہ حکومت ءِ و ننے الس ءِ مون تروک ویل آتا درک ءِ و نن اواری اٹ داویل آتا ایسری کن انتس ممکن مرے او کننگ اُن۔ کبینی نا کچ 32 درسد آن کم مرسا 6.7 درسد اسکان بسنے ، ننا قوم اتون دا کمٹمنٹ 2026 اسکان ئس ولے اللہ تعالیٰ نا خصوصی فضل و کرم اٹ دا ممکن مس و اینو کبینی سنگل ڈیجٹ آ بسنے، نن عارضی گام گیج آتون اوار اوار مریس مدتی ریلیف گام گیج کن ہم کوشست کننگ اُن،بجلی دُزی نا توننگ ، لائن لاسز اٹی کمتی وملکی آئی پی پیز آتون معاہدہ بھلا چیلنج ءِ، داآئی پی پیک بھاز کٹیا کرینو، او تینا زرکاری نا خڑچ نئے بیرہ کرینو بلکن بھلا کٹیاہم دوئی کرینو، داڑکن ساڑی حکومت 7 تُو اٹی پبی کوشست کرے ، ننا قائد نواز شریف بجلی نا نہاد آتیٹی کمتی کن وا ر وار ننے پارت تننگ اٹیءِ، وزیراعظم پارے کہ توانائی نا مچ آ ٹیم و ٹاسک فورس تینا پبی کڑد ادا کننگ اٹی ءُ۔ اوخلوص اٹ دے و نن خواری کرینو۔ داٹی کیہی چیلنج ہم مون تروک ئس، داآسان ءُ کاریم اس اف۔ اوپارے کہ قوم ءِ او خوشخبری تننگ خواہک کہ 5 آئی پی پیز تین پہ تینی رضامندی و قومی مفاد ءِ مون آ تخسا اینوآن پد معاہدہ ءِ پورو چٹفینو، اوفتے بقایاجات ہراٹی سود اوار اف ادائیگی کننگک۔ داڑآن صارف آتے 60 ارب روپئی سالانہ نا ریلیف ملک، بجلی نا نہاد کم مریک۔ آئی پی پیز نا مالک آک رضاکارانہ وڑاٹ اودے امنا کرینو ہراڑآ اوفتا منت واری ءِ ہرفنہ، آئی پی پیز آتون معاہدہ نا چٹفنگ آن 411 ارب روپئی نا بچت مریک۔ وزیراعظم پارےکہ حکومت نا گچین گام گیج آتا کمک اٹ صدر مملکت آصف علی زرداری تون اوار حلیف جماعت آتا ہم منت واری ءِ ہرفنہ۔ زرگزرانی گچینی ٹی کڑد آ آرمی چیف نا خصوصی منت واری ءِ ہرفیوہ۔ اوپارے کہ امریکہ ٹی آئی ایم ایف نا سروک تون اوڑدہی ٹی اودے داحساسیت آن معلومدار کریسن کہ اگہ بجلی نا نہاد آک ڈیہہ اناایلو ملک آتا مقابلہ ٹی زیات مریرہ تو داڑے صنعت و کشت وکشار شون ہلنگ کپک و نئے برآمد آک ودنگ کیرہ۔ اوپارے کہ ننا ٹیم آئی ایم ایف آ ہِننگ ءِ۔ وزیرخزانہ تون وزیر توانائی و خصوصی سلاہکار ہم کارہ و آئی ایم ایف ءِ مچ آ کیس ءِ پہہ کیرہ۔وزیرخزانہ ءِ مہالو آن آئی ایم ایف اہم اسپیکرنا وڑاٹ بٹنگانے ہراننکن شرفمندی اسے۔ وزیراعظم پارے کہ وزیرخزانہ نا بے پناہ کوشست و چین و سعودی عرب نا کمک اٹ آئی ایم ایف پروگرام آ معاہدہ مس۔ وزیراعظم پارے کہ پنچ آئی پی پیز آتون معاہدہ ءِ چٹفنگ پِر انا اولیکو پُڑی ءِ، بروک آ دے تیٹی پین خوشخبری ملک۔
