اسلام آباد۔ 10 اکتوبر (اے پی پی) پاکستان و سعودی عرب زرگزران، کشت وکشار، کانڑکنی وانفارمیشن ٹیکنالوجی کون آ اہم بشخ آتیٹی کمکاری ءِ ودفنگ نا عزم انا درشانی ءِ کرسا ڈیہہ و عالم اسلام کن اسہ شونہال و پرامن آخبت نا جوڑ کننگ کن اواری اٹ کاریم کننگ نا گرج آ زور شاغانے۔ داہیت انا درشانی ءِ پنچ شنبے نادے آ داڑے ایوان صدر اٹی صدر مملکت آصف علی زرداری و سعودی وزیر زرکاری خالد بن عبدالعزیز الفالح نا کماشی ٹی پاکستان نا دورہ غا بروک آ سعودی عرب نا ڈل انا نیام اٹ اوڑدہی ٹی کننگا۔ صدر مملکت ڈل ءِ بخیر کرسا پاکستان و سعودی عرب نا نیام اٹ متکن و ہرآزمائشت اٹی پورو سلوک آ سنگتی نا ذکر ءِ کرے۔ اودوستانہ تعلقداری ءِ مریس مدتی سٹریٹجک و اقتصادی شریداری ٹی بدل کننگ نا پاکستان نا است خواہی نا درشانی ءِ کرے و داہیت آ زور شاغا کہ داوڑنا کمکاری ہڑتوم آ کمکاری ہڑتوم آ ایلم ملک آتے پین خڑک اتیک۔ صدر مملکت خادم الحرمین الشریفین شاہ سلمان بن عبدالعزیزآل سعود کن پاکستان نا شرف و سعودی عرب تون یکجہتی کن پاکستان نا بدل مفروک عزم انا درشانی ءِ کرے۔ صدر مملکت ولی عہد و سعودی عرب نا وزیراعظم محمد بن سلمان آل سعودی نا دوراندیش سرکڑدہ ناہم ستاءِ کرے۔ اووژن 2030نا رداٹ سعودی عرب نا کنڈآن کروک آ قابل ذکر پیش رفت نا ستا ءِ کرے و مشکل وخت اٹی سعودی عرب نا کنڈآن پاکستان تون پدریسہ کمکاری آ منت واری ءِ ہرفے۔ صدر مملکت پارے کہ سعودی عرب نا شونداری و شونہالی نا مشاہدہ ءِ کرسا اودے خوشی مننگ ءِ۔ داوخت آ سعودی وزیر زرکاری خالد بن عبدالعزیز الفالح پارے کہ سعودی عرب پاکستان نا تزویراتی جغرافیائی اہمیت، قدرتی وسیلہ و قابل تجدید توانائی نا لائخی تے امنا کیک۔ اوپارے کہ سعودی عرب پاکستان نا انفراسٹرکچر و کانڑ کنی نا بشخ آتیٹی زرکاری کننگ نا ڈٹ جوڑ کرینے و دا چرجوئی ٹی اونا ڈل چندی بشخ آتیٹی 25 معاہدہ غاتیا دستخط کیک ہراڑآن ہڑتوم آ ایلم ملک آتا نیام اٹ اقتصادی کمکاری ءِ مون آدننگ ملک۔ اواومیت ظاہر کرے کہ معاہدہ غاتیا دستخط آن ہڑتوم آملک آتانیام اٹ اقتصادی کمکاری نا پوسکن آ دور بناکیک۔ فریق آک کشت وکشار و انفارمیشن ٹیکنالوجی نا بشخ آتیٹی کمکاری ءِ ودفنگ آ زور شاغار ۔ داوخت آ وزیر پیٹرولیم سینیٹر مصدق مسعود ملک، وزیر واپار جام کمال خان، وزیر نجکاری عبدالعلیم خان ، وزیرداخلہ سینیٹر سید محسن رضانقوی، وزیرمذہبی امور و بین المذاہب ہم آہنگی چوہدری سالک حسین و سینیٹر سلیم مانڈوی والا آن بیدس سعودی سفیر نواف سعید المالکی ئسک ہم ساڑی ئسر۔
