پاکستانی کمپنی تا کاریم نا کچ اٹی ودکی کرسا برآمد آتیٹی ودکی کننگ مریک، پاکستان و سعودی عرب نا نیام اٹ واپارنا کچ اٹی ودکی مننگ ءِ، بنجائی وزیر واپار جام کمال

اسلام آباد۔ 10 اکتوبر (اے پی پی) بنجائی وزیر واپار جام کمال پارینے کہ پاکستانی کمپنی تاکاریم نا کچ اٹی ودکی کرسا برآمد آتیٹی ودکی کننگ مریک، پاکستان و سعودی عرب نا  نیام اٹ واپار نا کچ اٹی ودکی مننگ ءِ، پاکستان سعودی وژن 2030 ءِ پورو کننگ کن افرادی قوت و ایلو آسراتی فراوان کننگ نا پور ولائخی تخک۔ داخیال آتا درشانی ءِ او پنچ شنبے نادے آ داڑے ہندی ہوٹل اٹی پاک سعودی بزنس فورم 2024 نا بنائی دیوان نا کماشی ٹی کرے۔ بنجائی وزیر واپار سعودی عرب آن بروک کاروباری بندغ، کمپنی و ایلو سعودی کمامدارآتا منت واری ءِ ہرفے۔ اوپارے کہ پاکستان و سعودی عرب اسیجائی دودو ربیدہ و قدر تخرہ و ہڑتوم آ ملک آتا نیام اٹ سوگو واپاری شریداری جوڑ ءِ۔ جام کمال پارےکہ پاکستان برنج، سُو، لیدر، دلیہ ، میوہ و ایلو مصنوعات آتابھلو کچ اس سعودی عرب ءِ برآمد کیک۔ اوپارے کہ وزیراعظم شہباز شریف نا وژن نا رداٹ وزارت واپار ہڑتوم آ کنڈآتا واپار ءِ ودفنگ کن جوان گام گیج کننگ اٹی ءِ۔ وزیر واپار پارے کہ پاکستان انفارمیشن ٹیکنالوجی نا بشخ اٹی سعودی عرب ءِ خذمت فراوان کننگ خواہک داکان بیدس فارماسیوٹیکل و ٹیکسٹائل نا بشخ آن ہم سعودی عرب ءِ برآمدآتیٹی ودکی کننگک۔ جام کمال پارے کہ پاکستان فروری 2025 اٹی سعودی عرب اٹی سنگل کنٹری ایگزیبیشن اڈتننگ والا ءِ ہراٹی سعودی زرکار و الس ءِ انفارمیشن ٹیکنالوجی، فوڈ ، معدنیات و ایلو بشخ آتیٹی زرکاری نا موقع ملک۔ اوپارے کہ پاکستان و سعودی عرب واپار اٹی ودکی و پائیدار شونداری نا دوئی کننگ کن اواری اٹ کاریم کننگ اٹی ءُ۔