کابینہ کمیٹی توانائی بجلی نا پیدوار و ہلنگ کن انڈپینڈنٹ ملٹی پلئیر مارکیٹ جوڑ کننگ نا منظوری ءِ تس

اسلام آباد۔ 09 اکتوبر (اے پی پی) کابینہ کمیٹی توانائی بجلی نا پیدوار و ہلنگ کن اسہ انڈپینڈنٹ ملٹی پلیئر مارکیٹ اس جوڑ کننگ نا منظوری ءِ تس۔ داادارہ نا کمک اٹ پاکستان اٹ بجلی نا اسہ جوان و شفاف مسابقتی مارکیٹ اس جوڑ کننگک، داادارہ غان کم خڑچ بجلی نا پیدوار و فراوانی نا نظام کن مریس مدتی ڈٹ بندی کننگ مریک۔ وزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف نا کماشی ٹی کابینہ کمیٹی توانائی نا دیوان چارشنبے نادے آ اڈ ہلک ہراٹی ملک انا توانائی بشخ انااصلاحات کن بھلو گام اس ہرفسا بجلی نا پیدوار و ہلنگ کن اسہ انڈپینڈنٹ ملٹی پلئیر مارکیٹ اس جوڑ کننگ نا منظوری ءِ تس۔ دیوان اٹی کابینہ کمیٹی انڈپینڈنٹ سسٹم اینڈ مارکیٹ آپریٹر(آئی ایس ایم او) نا ٹہیفنگ نا اصولی منظوری ءِ تس ہرادے کابینہ غان پک کننگک۔ آئی ایس ایم اوءِ کمپنیز ایکٹ 2017 نا رداٹ ایس ای سی پی آن رجسٹرڈ کننگک۔ آئی ایس ایم او حکومت نا ملک اٹی بجلی نا اسٹ انگا ہلوک آنا کڑد ءِ پدریسہ چٹفسا بجلی نا مارکیٹ ءِ ملٹی پلیئر انڈپینڈنٹ مارکیٹ اٹ بدل کیک ۔ دا ادارہ نا کمک اٹ پاکستان اٹ بجلی نا اسہ گچین و شفاف مسابقتی مارکیٹ اس جوڑ کننگک۔ دا نظام آن بجلی نا صارف آتے بشخوک آکمپنی تیان بیدس ایلو سپلائرز آن بجلی ہلنگ نا آسراتی فراوان مننگ کیک۔ داادارہ غان کم آن کم خڑچ انا بجلی نا پیدوار و فراوانی نا نظام کن مریس مدتی ڈٹ بندی کننگ مریک۔ حوال اٹی پاننگاکہ آئی ایس ایم او نا جوڑ کننگ آن بجلی نا بشخ اٹی گردشی وام و بجلی نا نرخ آتیٹی خاطر خواہ کمتی واقع مریک۔ آئی ایس ایم او نا بورڈ اٹی بجلی نا بشخ انا چاہندار آتا شمولیت ءِ پک کننگک۔ دیوان ءِ بجلی نا بشخ انا گردشی وام تیا حوال تننگا۔ وزیراعظم پارے کہ پاکستان نا بجلی بشخ انا اصلاحات کن اولیتی بنداو تیا گام گیج کننگءِ۔ وزیراعظم پارت کرے کہ بجلی بشخ اٹی دُزی و نسخان تے کم کننگ کن گام گیج آتے ترند و گچین کننگے۔ بجلی دُزی ٹی اوار بشخوک آ کمپنی تا ملازم آتا برخلاف محکمانہ کارروائی کننگے، بجلی بشخ انا اصلاحات و دُزی نا توننگ کن پوسکن آ ٹیکنالوجی نا کاریم اٹ اتنگ ءِ پک کننگے۔ دیوان اٹی وزیرخزانہ محمد اورنگزیب، بنجائی وزیر ڈٹ بندی و شونداری احسن اقبال، بنجائی وزیر اقتصادی امور احدخان چیمہ، بنجائی وزیر توانائی سردار اویس احمد خان لغاری، بنجائی وزیر پیٹرولیم مصدق مسعود ملک، وزیر مملکت پاور و فنانس  علی پرویز و کابینہ کمیٹی توانائی نا ایلو باسک آک ساڑی ئسر۔