وزیراعظم محمد شہباز شریف لیفٹیننٹ کرنل محمد علی شوکت شہید نا باوہ پیرہ ئی آ اُراغابس، خاہوت تون ہڑزخواہی نا درشانی ءِ کرے

فیصل آباد۔ 09 اکتوبر (اے پی پی) وزیراعظم محمد شہباز شریف پارینے کہ دہشت گردی نا عفریت نا پورو چٹفنگ اسکان جنگ ءِ برجاتخنہ، ملکی سلامتی کن پاک فوج انا آفیسر وورناتا قربانی تے اسُل است آن دننگ مفک، لیفٹیننٹ کرنل محمد علی شوکت وطن تون وفا نا تینا قول انا پاسداری ءِ کرسا تینا اینوءِ ننا آخبت آ ندر کرے، قوم  پاک فوج انا قربانی تیا گمر کیک۔ چارشنبے نادے آ  وزیراعظم محمد شہباز شریف قطبی وزیرستان نا علاقہ سپن وام اٹی فتنہ الخوارج نا برخلاف جنگ ترسا شہیدی نا جا ءِ نوش کروک آ لیفٹیننٹ کرنل محمد علی شوکت شہید نا فیصل آباد اٹی باوہ پیرہ ئی آ اُراغا ہنسا اونا خاہوت تون ہڑزخواہی و شہید کن بخشش نا دعاکرے۔ وزیردفاع خواجہ محمد آصف ، بنجائی وزیر حوالکاری وشینکاری عطاء اللہ تارڑ، وزیراعظم نا سلاہکار بین الصوبائی رابطہ رانا ثناءا للہ، سینیٹر طلال چوہدری ئسک ہم وزیراعظم تون اوار ئسر۔ داوخت آ گپ وتران کرسا وزیراعظم شہباز شریف پارے کہ پاک فوج انا شہیدآک کنتون اوار مچ آ قوم انا گمرآک ءُ۔ پاک فوج انا شہیدآک ننا پیشانی نا جھومرآک ءُ۔ ملکی سلامتی کن پاک فوج انا آفیسر وورناتا قربانی تے اسُل است آن دننگ مفک۔ پاکستانی قوم تینا شہید و اوفتا خاہوت نا مدام مقروض سلک۔ ہروڑنا دہشت گردی ءِ ماس کش کننگ کن سنبرینگوک اُن۔ وزیراعظم پارے کہ دہشت گرد آک سیکورٹی فورس آتا برخلاف سرسہب کارروائی کرینو۔ لیفٹیننٹ کرنل محمد علی شوکت شہید جون نا پرواہ ءِ کننگ آن بیدس دشمن نا ڈٹ کرمقابلہ ءِ کرے ۔ اوننا آخبت کن تینا اینو ءِ ندرکرے۔ وطن تون وفانا تینا قول انا او پاسداری ءِ کرے۔ لیفٹیننٹ کرنل محمد علی شوکت 4 و5 اکتوبر نا نیامی نن آ قطبی وزیرستان نا علاقہ سپن وام اٹی دہشت گرد آتا برخلاف کارروائی ناوخت آ اسہ ایلو آ سم کاری ٹی شہید مسوسس۔ اوڑتون اوار پاک فوج انا 5 پین ورناہم شہیدی نا جام ءِ نوش کریسر وخت ا س کہ 6 خوارجی دہشت گردجہنمی مسر۔