وزیراعظم محمد شہباز شریف نا فلسطین کن کمکی پروگرام نا لائحہ عمل ءِ مسہ دے اٹی ٹہیفنگ نا پارت

اسلام آباد۔ 08 اکتوبر (اے پی پی) وزیراعظم محمد شہباز شریف فلسطین کن کمکی پروگرام نا لائحہ عمل ءِ مسہ دے اٹی ٹہیفنگ نا پارت کرسا پارینے کہ صیہونی فوج انا زیر عتاب فلسطینی ایلم تا کمک کن ننے بحیثیت قوم متحرک مروئی تمک، حکومت لبنان اٹی اختہ 71پاکستانی شاری تے بذریعہ دمشق وطن آ پدی اتنگ اٹی ءِ۔ سے شنبے نادے آ وزیراعظم آفس نا پریس ونگ آن جاری بیان نا رداٹ وزیراعظم محمد شہباز شریف نا کماشی ٹی  غزہ و فلسطین اٹ پاکستان نا کنڈآن کمکی گڑا گدریفنگ نا پیش رفت نا بابت دیوان اس اڈہلک۔ دیوان اٹی حوال اٹی وزیراعظم ءِ پاننگاکہ اکتوبر 2023 آن داتم اسکان پاکستان نا کنڈآن 1810ٹن آ تالان دوائی، غذائی گڑا، لویس و ایلو کمکی گڑاتا 10 کھیپ فلسطین آ گدریفنگانے، مستی پاکستانی شاری تے جنگ زدہ علاقہ غاتیان وطن آ پدی اتنگ کن گام گیج کننگ انگ ءِ۔ وزیراعظم مسہ دے اٹی حکومت پاکستان نا کنڈآن فلسطین کن کمکی پروگرام نا لائحہ عمل اس ٹہیفنگ ناپارت کرے۔ اوپارے کہ صیہونی فوج انا زیرعتاب فلسطینی ایلم تا کمک کن ننے بحیثیت قوم متحرک مروئی تمک، کمکی سرجزآتیٹی ملک انا پنی آ این جی اوتے اوار کننگے، غزہ غان تعلق تخوک آ زیات آن زیات طالب علم آتے پاکستان اٹ تعلیمی آسراتی فراوان کننگے، دا سرگرمی ٹی سرکاری ونجی بشخ آتیان تعلق تخوک آ تعلیمی ادارہ غاتا بشخ ہلنگ ءِ پک کننگے۔ اوپارے کہ حکومت پاکستان لبنان اٹی اختہ 71 پاکستانی شاری تے بذریعہ دمشق وطن آ پدی اتنگ اٹی ءِ۔