چین نا کمک اٹ شی پاور گام انا مسخت بلوچستان نا زالبول آتا جا ن جوڑی نا آسراتی اسکان رسینگ ءِ ودفوئی ءِ، کوآرڈی نیٹر موسمیاتی بدلی رومینہ خورشید عالم

کوئٹہ۔ 08 اکتوبر (اے پی پی) وزیراعظم نا کوآرڈی نیٹر موسمیاتی بدلی و چاگڑد رومینہ خورشید عالم پارینے کہ شی پاور گام انا مسخت بلوچستان نا زالبول آتا جان جوڑی و سفائی نا آسراتی اسکان رسینگ ءِ ودفوئی ءِ، دا گام پاک چین اقتصادی راہداری نا رداٹ برجاکمکاری نا عکاسی ءِ کیک، داڑآن اسکول آتیٹی ڈراپ ریٹ کم و ورنامسن تے تینا جان جوڑی نا ویل آتے ایسر کننگ اٹ کمک رسینگک۔ مسن و زالبول آتے حفظان صحت و سفائی ستھرائی نااہمیت آ گاہی فراوان کننگ المی ءِ۔ داہیت ءِ او بنجائی وزارت موسمیاتی بدلی و چین نا کمک اٹ زالبول آتیٹی حفظان صحت ناکٹ بشخنگ نا دود آن تران کرساپارے۔ دود آن وزیراعلیٰ بلوچستان میر سرفراز بگٹی، سینیٹ نا قائمہ کمیٹی انسانی حق انا چیئرپرسن ثمینہ ممتاز زہری و صوبائی وزیر تعلیم راحیلہ حمید درانی ئسک ہم تران کریر۔ دوداٹی شی پاور گام انا رداٹ زالبول آتیٹی حفظان جان جوڑی نا بابت کٹ بشخنگا۔ رومینہ خورشید عالم پارےکہ شی پاور گام انا مسخت بلوچستان نا زالبول آتا جان جوڑی و سفائی نا آسراتی اسکان رسینگ ءِ ودفنگ ءِ، ڈٹ انا صوبہ ناضلع لسبیلہ، حب وگوادر اٹی 20 ہزار کٹ آتا بشخنگ آن بناءِ کننگانے۔ وزیراعظم ناکوآرڈی نیٹر پارےکہ حفظان صحت ناکٹ بشخنگ نا مسخت زالبول آتے واکدار کننگ ءِ و دا گام پاک چین اقتصادی راہداری نارداٹ برجاکمکاری نا عکاسی ءِ کیک، داکان مست حب و اوتھل نا سرکاری اسکول آتا طالب علم آتیٹی حفظان صحت نا کٹ بشخنگانے، داڑآن اسکول آتیٹی ڈراپ ریٹ کم و ورنامسن تے تینا جان جوڑی نا ویل آتے ایسر کننگ اٹ کمک رسینگک۔ اونا پاننگ ئس کہ پاکستان خاص وڑاٹ بلوچستان نا خلقی علاقہ غاتیٹی زالبول و مسن تیکن حفظان صحت و سفائی نا بابت آسراتی تا کمتی ءِ، اوپارے کہ چینی حکومت نا کمک اٹ بلوچستان اٹی بناکروک دام گام انا مسخت صوبہ نا ورنازالبول آتا جا ن جوڑی و تعلیم آ چکار کرسا زند انا آب ءِ گچین کننگ ءِ۔ داکٹ آتا بشخنگ(ہرافتے ٹی سینیٹری پیڈ، صابون، ہینڈ سینیٹائزر، حفظان صحت نا وڑوڈول آتا بابت تعلیمی مواد تون اوار المی حفظان صحت نا مصنوعات آک اوار ءُ) نا مسخت صوبہ نا ورنامسن تیٹی جان جوڑی نا گچین وڑوڈول آتے مون آ دننگ ءِ۔