اینوہم قوم ءِ 8 اکتوبر نا زمی جمب آن پد مروک آ سیوت و یکجہتی نا گرج ءِ، چیئرمین سینیٹ ناکلہو

اسلام آباد۔ 08 اکتوبر (اے پی پی) چیئرمین سینیٹ سید یوسف رضاگیلانی پارینے کہ 8 اکتوبر 2005نا زمی جمب قوم اکن آزمائشت اس ئس و قوم دا آزمائشت نا وخت اٹی ہراسیوت و یکجہتی نا درشانی ءِ کرے اونا مٹ ملیپک۔ سے شنبے نادے آ سینیٹ سیکرٹریٹ آن جاری بیان نا رداٹ 8 اکتوبر نا زمی جمب نا برسی نا وخت آ تینا کلہواٹی اوپارےکہ دا زمی جمب نا بھسکاری و اوٹی شہید مروک آتے نن اینو اسکان است آن دتنون۔ چیئرمین سینیٹ پارےے کہ مچ آقوم 8 اکتوبر نا قدرتی آفت اٹی تینا دوست آتیان  جتامروک آتا غم اٹی بریبر نا شریک ءِ۔ چیئرمین سینیٹ سید یوسف رضاگیلانی پارےکہ 8 اکتوبر نا زمی جمب اٹی مچ آ قوم تینا مصیبت زدہ ایلم تتون سیسہ پلائی دیوال اسے آنبار سلوک ئس۔ اوپارے کہ دا بے مٹ قومی سیوت و یکجہتی زہمی تے دُوارہ آن تینا نت تیا سلنگ کن اسہ پوسکن ءُ حوصلہ و عزم اس تس۔ اوپارےکہ داقدرتی آفت اٹی آزاد کشمیر و قطبی علاقہ غاتیٹی 80 ہزار آن زیات بندغ شہید و لکھ آ بے اُرا مسر۔ سید یوسف رضاگیلانی پارے کہ زہمی تا بحالی اسہ مشکل ءُ ریسہ اس ئس ولے قومی سیوت و یکجہتی و سنگت ملک آتا کمک اٹ بحالی نا دا مشکل کاریم ممکن مس۔ چیئرمین سینیٹ مستی پارے کہ اینو ہم قوم ءِ 8 اکتوبر نا زمی جمب آن پد مروک آسیوت و یکجہتی نا گرج ءِ۔ چیئرمین سینیٹ سید یوسف رضاگیلانی اللہ تعالیٰ آن 8 اکتوبر 2005 نا زمی جمب اٹی شہید مروک آتا درجہ غاتا بڑزی و وطن عزیز ءِ داوڑنا آفت آتیان رکھینگ نا دعاکرے۔