وزیراعظم محمد شہباز شریف نا ‘‘قدرتی آفت آتا بابت سگ انا قومی دے ’’8 اکتوبر 2024 نا وخت آ کلہو

اسلام آباد۔ 08 اکتوبر (اے پی پی) وزیراعظم محمد شہباز شریف 8 اکتوبر 2005  نا قیامت خیز زمی جمب نا زہمی تتون ہمدردی نا درشانی ءِ کرسا پارینے کہ پاکستان نا الس و ادارہ غاک موسمیاتی بدلی و چاگڑدی خطرہ غاتیان ودی مروک آ بھسکاری و تنکی تتون مون تننگ کن مدام بے پناہ عزم ولائخی نا درشانی ءِ کرینو، پاکستان موسمیاتی بدلی تا زموار مفننگ آن پد ہم اونا بے پناہ مضر اثرآتون مون تننگ ءِ، ، ای اینونادے غٹ اسٹیک ہولڈر آتیازور شاغیوہ کہ او اسہ ایلو نا کچ و لائخی تا بارواٹی ہم گرنچی ودی کیر۔ دوشنبے نادے آ  وزیراعظم آفس نا میڈیا ونگ آن جاری بیان اٹی وزیراعظم محمد شہباز شریف ‘‘ قدرتی آفت آتا بابت سگ انا قومی دے’’8 اکتوبر 2024 نا وخت آ کلہو اٹی پارے کہ 8 اکتوبر ننے 2005نا بھسکار زمی جمب نا یات ترفک ہراتم اسہ عظیم سانحہ اس پاکستان وآزاد جموں وکشمیر آ بس۔ اوپارے کہ ننادعاک ہموغٹ مخلوق کن ءُ ہرافک دا زمی جمب اٹی جون ومال انا نسخان سگار۔ وزیراعظم پارے کہ 2005 نا بھسکار زمی جمب آن پد 2022 نا نوکاپ مستین نا غٹ ریکارڈ پرغوک آ اسہ بھلو قدرتی آفت اس ئس۔ اوپارے کہ پاکستان نا الس و ادارہ غاک موسمیاتی بدلی و چاگڑدی خطرہ غاتیان ودی مروک آ بھسکاری و تنکی تتون مون تننگ کن مدام بے پناہ عزم و لائخی نا درشانی ءِ کرینو۔ وزیراعظم پارے کہ پاکستان موسمیاتی بدلی نا زموار مفننگ آن پد ہم اونا بے پناہ مضراثر آتون مون تننگ ءِ۔ اوپارے کہ بے گمانی بھسکار قدرتی آفت آتا وار وار آوقوع پذیر مننگ آن مست آن ویل آتا گواچی ننا زرگزران ءِ بھسکار ءُ دھچکہ اس رسینگانے۔ وزیراعظم پارے کہ ای  اینو نیشنل ڈیزاسٹر مینجمنٹ اتھارٹی (این ڈی ایم اے) ءِ اونا خواری کن ستاءِ کیوہ کہ او داوڑنا قدرتی آفت آتیکن قومی ردعمل نا وڑاٹ اسہ پائیدار و گچین وڑاٹ جوڑ کرے۔ اوپارے کہ ننا قومی ردعمل نا اہم گڑاتیٹی آفت آتا خطرہ ءِ کم کننگ کن فعال وڑاٹ کاریم کننگ و آفت آتون مون تننگ کن منظم وڑاٹ و فریم ورک اس فراوان کننگ اوار ءِ۔ اوپارے کہ داہیت است جمی نا سوب ءِ کہ این ڈی ایم اے نا نیشنل ایمرجنسی آپریشن سینٹر (این ای او سی) ٹی قومی آفت آتون مون تننگ نا گچین لائخی ساڑی ءِ، این ای او سی نا بنداو بڑزکو درجہ نا ٹیکنالوجی آ تخنگانے تانکہ انسانی زند و انفراسٹرکچر ءِ بچفنگ کن آفت آتا بنائی وارننگ وخت آن بھاز مست تننگ مرے۔ اوپارے کہ ای اینونادے غٹ اسٹیک ہولڈر آتیا زور شاغیوہ کہ او اسہ ایلو نا کچ و لائخی تا بارواٹی ہم گرنچی ودی کیر تانکہ ہندی، زونل، قومی ، جہانی و نجی بشخ آتا نیام اٹ ‘ مچ آ راج انا ’ نقطہ نظر ءِ مون آ تخسا زیات آن زیات تین پہ تینی کمکاری ءِ مون آ دننگ مرے۔ گچین کمکاری ، ہلہلہ ئی حالیت آتیکن گیگ بدل لائحہ عمل اسے نا ساڑی گری و مرمر انگا علاقہ غاتسکان آفت آتا گمانی خطرہ غاتا آگاہی قدرتی آفت آتون مون تننگ کن بھاز اہم ءِ۔ شہباز شریف پارے کہ ‘قدرتی آفت آتا بابت سگ انا دے’ ننکن گچین وڑوڈول ءِ تینا کننگ و پالیسی و حکمت عملی تیا عملدرآمد کننگ نادے ءِ، ہرانا مسخت ننا قومی سگ ءِ سوگو کننگ ءِ، ننا پالیسی گام گیج آتیٹی چندی بشخ بشمول انفراسٹرکچر نا پائیدار شونداری، آفت آتون مون تننگ نا گچین تیاری، نیزگاری نا چٹفنگ، ہندی ڈغار تا رکھ کاریم اٹ اتنگ نا ڈٹ بندی، تعمیراتی ضابطہ غاتا پابندی، آبی وسیلہ غاتا گچین بست وبند ، پوسکن آ کشت وکشار و کرکی علاقہ غاتون اوار مچ آملک اٹی جنگل آتا کچ اٹی ودکی نا بابت گام گیج آک بایدے اوار مریر۔ وزیراعظم پارےکہ داوخت آ ، ای 2022نا نوکاپ نا بھسکاری تیٹی ننا قومی کہول آ کوشست آتیٹی کمکاری فراوان کننگ اٹ جہانی برادری، سول سوسائٹی و نجی سخی تا کنڈآن تروک آ نہادی کمک کن منت واری ءِ ہرفیوہ۔ وزیراعظم پارے کہ پاکستان نا الس تنکی تا وخت آ انسانی ہمدردی و سخاوت کن تینا مٹ تینٹ ءُ، 2005 نا زمی جمب و 2022 نا نوکاپ اٹی پاکستانی تا ردعمل اوفتا فیاضی نا روشنا درور مسنے۔ اوپارے کہ اللہ نا فضل وکرم اٹ نن مدام تینا بہادر پاکستانی ایلم و ایڑھ تا کمک اٹ داوڑنا غٹ آفت آتا مقابلہ ءِ کرینن وکرسا کینہ۔ اودعاکرے کہ اللہ تعالیٰ اسہ سوگو ءُ پاکستان اس جوڑ کننگ اٹ ننا کمک ءِ کے۔